“Uzun müddətdir, mühacirətdə olan Orduxan Bəbirov, Qurban Məmmədov, Tural Sadıqlı və digərlərinin İnterpol xəttilə axtarışa verilməsi düzgün qərardır. Onlar xalqımıza, dövlətimizə qarşı şər-böhtan kampaniyası həyata keçiriblər. Bu şəxslər çirkin siyasətin qullarıdırlar. Dövlətimizə qarşı təxribatla məşğul olanlar ekstradisiya edilməli və cəzalandırılmalıdırlar”.
Deputat: “İnterpol”la axtarışa verilən şəxslərlə yanaşı, onlara dəstək verənlər də cəzasını almalıdırlar
Bunu Pravda.az-a açıqlamasında Milli Məclisin deputatı Cavid Osmanov deyib.
C.Osmanov qeyd edib ki, adı çəkilən şəxslərin Azərbaycana ekstradisiya edilməsi hələ 2019-cu ildə gündəmə gəlib: “Azərbaycan Baş Prokurorluğunun yaydığı məlumatda qeyd olunub ki, Azərbaycan vətəndaşı 1980-ci il təvəllüdlü İsayev Elvin İltixam oğlu Ukrayna miqrasiya qanunvericiliyinin tələblərini pozduğuna görə 12 dekabr 2019-cu il tarixdə Azərbaycana deportasiya olunub və Baş Prokurorluğun İstintaq idarəsində istintaq edilən cinayət işi üzrə barəsində Nəsimi rayon məhkəməsinin 22 avqust 2019-cu il tarixli qərarı əsasında seçilmiş həbs qətimkan tədbirinin icrası ilə əlaqədar 2019-cu il dekabrın 14-də Penitensiar xidmətin 1 saylı istintaq təcridxanasına yerləşdirilib. İstintaqla müəyyən edilib ki, Elvin İsayev 2018-ci ilin əvvəllərində Azərbaycan Respublikasının vətəndaşları olmaqla hazırda Avropanın müxtəlif ölkələrində müvəqqəti məskunlaşmış Orduxan Bəbirov, Qurban Məmmədov, Orxan Ağayev, Rəfael Piriyev, Əli Həsənəliyev, Tural Sadıqlı, Süleyman Süleymanlı və şəxsiyyətləri istintaqa məlum olmayan digər şəxslərlə qabaqcadan əlbir olan bir qrup şəxs halında birləşərək Azərbaycan Respublikasını tərk etdikdən sonra, müvəqqəti məskunlaşdığı Rusiya Federasiyasının Sankt-Peterburq şəhərində özünə məxsus hesablar vasitəsilə “youtube” və “facebook” sosial şəbəkələrində Azərbaycan dilində yerləşdirdiyi video müraciətlərində, yayımladığı video görüntülərdə və paylaşımlarda hakimiyyətin zorla ələ keçirilməsi və zorla saxlanılmasına, habelə ölkəmizin konstitusiya quruluşunun zorla dəyişdirilməsinə və ərazi bütövlüyünün parçalanmasına yönələn ifadələr işlətməklə Azərbaycan Respublikası vətəndaşlarına müraciət edərək hakimiyyət nümayəndələrinin qanuni tələblərinə fəal itaətsizlik və müqavimət göstərilməklə kütləvi iğtişaşlar və zorakılıqlar etməyə açıq çağırışlar edib. Elvin İsayev Cinayət Məcəlləsinin 12.1, 34.2, 220.2 (qabaqcadan əlbir olan bir qrup şəxs tərəfindən hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) və 12.1, 34.2, 281.2-ci (qabaqcadan əlbir olan bir qrup şəxs tərəfindən təkrar dövlət əleyhinə yönələn açıq çağırışlar etmə) maddələri ilə təqsirləndirilən şəxs qismində cəlb edilib, hazırda cinayət işi üzrə istintaq yekunlaşdırılmaqla baxılması üçün aidiyyəti üzrə Bakı Ağır Cinayətlər Məhkəməsinə göndərilib. Eyni zamanda, Elvin İsayevin qabaqcadan əlbir olan bir qrup şəxs halında cinayət əməllərində iştirak etmiş Orduxan Bəbirov, Qurban Məmmədov, Orxan Ağayev, Rəfael Piriyev, Əli Həsənəliyev, Tural Sadıqlı və Süleyman Süleymanlı barəsində Cinayət Məcəlləsinin 12.1, 34.2, 220.2 və 12.1, 34.2, 281.2-ci maddələri ilə ayrıca icraata ayrılmış cinayət işi üzrə həmin şəxslər təqsirləndirilən şəxs qismində cəlb ediliblər, Baş Prokurorluğun təqdimatı əsasında Nəsimi rayon məhkəməsinin müvafiq qərarları ilə barələrində həbs qətimkan tədbiri seçilib. İstintaq idarəsi tərəfindən qeyd edilən şəxslər barəsində beynəlxalq axtarışın elan edilməsinə dair müvafiq qərarlar qəbul edilməklə, icra edilməsi üçün Daxili İşlər Nazirliyinə, Dövlət Təhlükəsizlik Xidmətinə, həmçinin “İnterpol”-un Milli Mərkəzi Bürosuna göndərilib. Ümid edirik ki, bu xəyanətkarlar, satqınlar ölkəmizə gətiriləcək. Bu insanlar Azərbaycanın düşmənlərinə xidmət ediblər. Təbii ki, bu işlər həyata keçirilərkən kimlərdənsə göstəriş alıblar. İnanıram ki, onların arxasında duranlar, xüsusən də “5-ci kolon”un nümayəndələri yaxın gələcəkdə tam ifşa ediləcək. Artıq bir sıra faktlar üzə çıxıb. Bir neçə gün öncə gördük ki, Qurban Məmmədov “xidmət”i müqabilində Bakıda saxta yollarla mülklər əldə edib. Məlumatlar var ki, onlara uzun müddət yüksək vəzifədə çalışan şəxslər dəstək olublar. “İnterpol”la axtarışa verilən şəxslərlə yanaşı, onlara dəstək verənlər də cəzasını almalıdırlar. Bu şəbəkələr düşmənə xidmət ediblər. Azərbaycanın da ən böyük düşməni ermənilərdir. Xocalı faciəsini törədənlərə, torpaqlarımızı işğal edənlərə necə xidmət etmək olar? Bu şəxslər ermənidən də pisdirlər. Xəyanətkarlar dövlət, xalq qarşısında cavab verməlidirlər”.
