Virusla mübarizədə qışa hazırlıqla bağlı AÇIQLAMA

Pandemiya dövründə payız mövsümünə hazırlıqlı olmaq çox önəmlidir. Çünki hər kəs bilməlidir ki, peyvəndin önümüzdəki 1-2 ay ərzində tapılıb kütləvi şəkildə tətbiq edilməsi gözlənilmir. Ona görə də peyvənd tapılana qədər kütləvi yoluxma halları artmasın deyə, sanitar-epidemioloji vəziyyətin nəzarətdə saxlanılması üçün planlı şəkildə hazırlaşmaq lazımdır”.

Pravda.az-ın xəbərinə görə, bunu Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru Nuran Abdullayev deyib.

Onun sözlərinə görə, xüsusi karantin rejimi dövründə yumşalmalar zamanı qalıq viruslu xəstələrin mövcudluğu nəzərə alınmalıdır:

“Elm sübut edir ki, bəzi inkişaf etmiş ölkələrdə, eləcə də Fransada bu günlərdə virusa yoluxanların sayının yenidən 5000-in üzərində olmasının səbəbi yumşalmalara gedilən zaman virusa yoluxmuş qalıq xəstələrdir. Həmin bu xəstələr yumşalmaların başlanğıcında saylarının azlığından və ya xəstəliyi yüngül keçirdiklərinə görə o qədər də ciddiyə alınmır, amma müəyyən müddətdən sonra yoluxma sayları bəlli bir həddi keçərkən ölkənin bütün sahələrinə təsir edə biləcək, arzu olunmaz bir mənzərə yaradır. Bir çoxları bu mərhələdə sadəcə test saylarını çoxaltmağı məsləhət görür. Amma unutmaq olmaz ki, yoluxma hallarının müəyyənləşdirilməsi ilə əlaqədar aparılan testlərin sayını artırmaq koronavirusla mübarizənin ilkin mərhələsinə aid olub. Hazırki mərhələdə isə test sayını artırmaqla virusla mübarizə aparıb qələbə qazanmaq olmaz. Unutmayaq ki, çoxlu test etməklə sadəcə olaraq viruslu xəstələrin sayını bilmək olur, yəni test vasitəsilə yoluxmanın qarşısı alınmır”.

Azərbaycanlı alim virusun ilin sonuna qədər mutasiyaya uğraması ilə bağlı yayılan məlumatlara münasibət bildirib:

“Təəssüflər olsun ki, virus əvvəlki gücündə qalır. Ona görə də bu barədə yayılan məlumatların elmi əsası yoxdur. Virusda olan dəyişikliklər o demək deyil ki, artıq əvvəlki kimi yoluxdurmur. Yəni müasir elm virusun mutasiyaya uğramasını və ya məhv olmasını təsdiqləmir”.

“Azərbaycanda qışa qədər nəinki bir yerə toplaşıb klastrlar yaratmağın qarşısı alınmalıdır, eyni zamanda klastrlar arasında əlaqənin də tam kəsilməsinə nail olunmalıdır. Yəni bir adam insanların bir araya toplaşıb keçirdiyi tədbirdən çıxıb, eyni şəkildə təşkil edilmiş hər hansı bir tədbirə getməyinin qarşısı da alınmalıdır. Virusa yoluxan şəxslər arasında yerindəcə qısa sorğu aparılmalı, virusa harada yoluxduğu müəyyən olunmalıdır. Onların insanların bir yerə toplaşdığı yerlərdə iştirak edib-etməməsi mütləq öyrənilməlidir. Bundan başqa karantin və izolyasiya tədbirləri də sonuncu elmi tədqiqatlara əsaslanmalıdır.”, N.Abdullayev bildirib.