Məlahət İbrahimqızı: “Məhdudiyyətlər yenidən tətbiq edilə bilər”

"Pandemiya ilə yalnız Azərbaycan deyil, bütün dünya mübarizə aparır. Müəyyən mərhələdə yumşalmalara gedildi, lakin hazırda mövcud vəziyyət qiymətləndirildikdən sonra yenidən bəzi məhdudiyyətlərin tətbiq edilməsinə ehtiyac yaranarsa əhali bunu anlayışla qarşılamalıdır".

Bunu millət vəkili Məlahət İbrahimqızı deyib.

O bildirib ki, bu günə qədər Azərbaycanda COVID-19 testlərinin keçirilməsi və virusa yoluxan insanların tez bir zamanda aşkarlanması digər ölkələrlə müqayisədə ölkəmizin bu bəladan daha az ziyanla çıxmasına böyük kömək edib:

“Təsəvvür edin heç bir ölkədə bu qədər modul tipli xəstəxanalar inşa edilmədi. Üstəlik ölkədəki ən yaxşı xəstəxanalar da koronaviruslu xəstələrin müalicəsi üçün ayrılıb. Ölkədə pandemiya dövrü başlayandan Nazirlər Kabineti yanında operativ qərargahın üzvləri, mütəxəssislər vəziyyəti nəzarətdə saxlayır. Daim gündəlik yoluxma sayını, sağalma və ölüm hallarını müşahidə edir.

Bu günə qədər verilən bütün qərarlar mövcud vəziyyətə uyğun olub, bu gündən sonra da karantin qaydalarına edilən dəyişikliklər cəmiyyətin sağlamlığının qorunmasına yönələcək”.

M.İbrahimqızının sözlərinə görə, karantin qaydaları yumşaldılıbsa, bu o demək deyil ki, həmin qaydalara yenidən dəyişiklik edilə bilməz:

“May ayında operativ qərargah vəziyyəti nəzərə alaraq yumşalmalara getdi. Lakin yumşalmalardan sonra yoluxma sayında artım oldu. Vəziyyət yenidən qiymətləndirildi və bəzi məhdudiyyətlər qoyuldu. Karantin həbsxana demək deyil. İnsanlar bunu birmənalı olaraq başa düşməlidir ki, dövlət bütün yükü öz üzərinə götürüb.

Əhaliyə nə qədər maddi dəstək verilsə də bu vəziyyət hökumətə də ziyan vurub. Bu gün vəziyyət müşahidə edilir. Karantin qaydalarını operativ qərargah təşkil edir. Yenə də yoluxma halları artarsa, müəyyən məhdudiyyətlər yenidən tətbiq edilə bilər. Bu insanlarda qorxu panika yaratmasın. Ekspertlər gündəlik vəziyyəti dəyərləndirirlər. Görürsünüz, rayonlara gediş-gəliş belə açıldı.

Təbii ki, vəziyyətə uyğun olaraq. İnsanlar karantin qaydalarına əməl etməzsə, zərurət olmadıqca küçələrə çıxarsa, qoruyucu vasitələrdən təlimata uyğun şəkildə istifadə etməzsə, yoluxma sayı arta bilər. Odur ki, yumşalmalara gedildiyi kimi, zərurət olarsa məhdudiyyətlər də geri qaytarıla bilər. Nəzərə almaq lazımdır ki, payız mövsümü gəlir. Tənəffüs yolları xəstəliklərinin baş qaldırdığı bir dönəmdə, paralel olaraq koronavirusla mübarizə aparmaq lazımdır. Bütün bunlar ölkəmizin rifahı üçün nəzərə alınmalıdır. Əhali də bu məsələdə hökumətə dəstək olmalıdır”.Oxu.az

Tarix: 15 Sentyabr 2020, 11:47

Xəbər lenti