Aslan İsmayılov: “Rusiyanın vəzifəli şəxsləri Azərbaycan xalqını aşağılmaqda davam edirlər”

“Azərbaycan vətəndaşları kimi Rusiyanın Qarabağ problemindəki rolunu, müharibədə tərəf olduğunu və hansı məqsədlə müharibənin dayandırılmasında israrlı olduğunu çox gözəl bilirəm. Azərbaycan hakimiyyətinin də müharibəni nə üçün dayandırdığını və bunları bölgədə sülhün yaranması üçün etdiyini də çox yaxşı bilirik. Əksəriyyətimiz Rusiya sülhməramlılarının Qarabağa yerləşdirilməsinin əleyhinə olsaq da məhz bölgədə sülhün yaranmasına görə susduq”.

Pravda.az-ın xəbərinə görə, bunu hüquqşünas Aslan İsmayılov deyib.

“Biz Rusiyanın Dağlıq Qarabağın işğalında həlledici rolunu bilirik, unutmamışıq və heç vaxt unutmayacayıq. Bununla belə, inanmaq istəyirik ki, Rusiya rəsmiləri elan etdikləri kimi nəhayət ki, bölgədə sülhün bərqərar olmasına çalışacaq, çünki bu günkü gün bu, birinci növbədə Rusiyanın öz maraqlarına da cavab verir. Əks halda, Rusiya tərəfindən bölgədə yenə də münaqişənin qızışdırılacağı təqdirdə Rusiya artıq Azərbaycanı birdəfəlik itirəcək və bunun qarşısını heç bir hakimiyyət ala bilməyəcək. Ona görə də Rusiya tərəfi 10 noyabr 2020-ci il tarixdə öz üzərinə götürdüyü öhdəlikləri yerinə yetirməlidir. Həmin Sazişin 4-cü bəndində isə göstərilir ki, Rusiya Federasiyasının sülhməramlı kontingenti erməni silahlı qüvvələrinin Azərbaycan ərazisindən çıxarılması ilə paralel şəkildə yerləşdirilir. Sazişin imzalanmasından bir neçə saat keçmiş Rusiya sülhməramlıları Azərbaycan ərazisinə yerləşdirildi, ancaq nədənsə müqavilənin imzalanmasından 1 aydan artıq vaxt keçməsinə baxmayaraq hələ də erməni silahlı qüvvələri Azərbaycan ərazisində qalmaqda və hərbçilərimizi qətlə yetirməkdə davam edirlər. Bundan başqa, görünən odur ki, Rusiya sülhməramlıları öz missiyalarından kənara çıxan bir çox addımları da atır, nəzərdə tutulmayan qüvvələrini cürbəcür adlarla əraziyə yeridir. Az qala Ermənistanda yaşayanları da zorla Qarabağa yerləşdirən sülhməramlıları bu günə qədər öz doğma yerlərindən didərgin düşmüş bir nəfər azərbaycanlını belə öz yaşayış yerlərinə qaytarmayıb, öz nəzarətlərinə götürdükləri ərazilərdə silahlı erməni birləşmələrinin sərbəst hərəkətinə nəinki göz yumur, hətta dəstək verir. Bundan başqa, müharibənin ilk günlərindən başlayan anti-Azərbaycan təbliğatı bu gün də davam edir, yalandan ölkəmizdə gərginlik yaradacaq məlumatlar, böhtanlar yayırlar. Rusiyanın ali dövlət orqanlarında yüksək vəzifə tutan şəxslər Azərbaycan dövlətini, hakimiyyətini, xalqını aşağılmaqda davam edirlər və bunu Rusiya rəhbərlərinin icazəsi olmadan edildiyinə də inanmıram. Rusiya rəhbərliyi anlamalıdır ki, Azərbaycan xalqının səbri, Rusiya ilə dostluq, qonşuluq münasibətlərinin saxlanması ümidi sonsuz ola bilməz. Qarabağda bir daha müharibənin alovlanması bütün postsovet məkanını ağuşuna alacağını heç kim, heç vaxt unutmamalı, gec deyilkən hər gün sözdə elan etdiklərini əməldə də yerinə yetirməlidirlər” – A.İsmayılov bildirib.

Tarix: 15 Dekabr 2020, 22:30

Xəbər lenti