Rövşən Rzayevin milyonları udan “müasir tikintilər”i - Şübhəli ten...

Rövşən Rzayevin milyonları udan “müasir tikintilər”i - Şübhəli tender

19 may 2021, 18:19 1 323

Paylaş:

Rövşən Rzayevin milyonları udan “müasir tikintilər”i - Şübhəli tender

Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamenti Sabirabad rayonunda fərdi yaşayış evlərinin təmiri işləri üçün elan etdiyi tenderin qalibini açıqlayıb.

Pravda.az xəbər verir ki, qalib şirkət “Müasir Tikintilər” MMC-dir. Qurum şirkətin Sabirabadda görəcəyi işlərə görə 289 299.99 AZN ödəyəcək.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Müasir Tikintilər” MMC-nin 25 fevral 2010-cu ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Yasamal rayonu, Landau küçəsi, məhəllə 546, mənzil 118-də yeləşir. MMC-nin qanuni təmsilçisi isə Tusi İlkin Tusi oğludur.

Açıq mənbələrdə şirkət və onun qanuni təmsilçisi barədə məlumatlar məhduddur. 11 ildir fəaliyyət göstərən “Müasir Tikintilər” MMC-nin və onun qanuni təmsilçisi haqqında, demək olar ki, heç bir məlumatın olmaması şübhəli görünür.

Araşdırmalarımız zamanı məlum olub ki, bu şirkət əsasən Qaçqınların və Məcburi Köçkünlərin İşləri üzrə Dövlət Komitəsi və onun alt qurumlarının elan etdiyi tenderlərin qalibi olur.

Təkcə 2019-2020-ci illərdə Məcburi Köçkünlərin Sosial İnkişaf Fondu və “Qaçqınkom”un Mənzil İstismar Depratamenti “Müasir Tikililər” MMC ilə ümumi maliyyə dəyəri 13 573 766.26 AZN təşkil edən 5 müqavilə imzalayıb:

1.Ağcabədi rayonunun "Taxta Körpü" ərazisində müvəqqəti məskunlaşmış 1500 (I mərhələ - 645) məcburi köçkün ailəsi üçün zəruri sosial-texniki infrastrukturu olan 245 ailəlik Qarakeçdi qəsəbəsində 56 ədəd fərdi yaşayış evlərinin tikintisi – 4 204 046.04 AZN

2.Abşeron rayonu ərazisində 1890 məcburi köçkün ailəsi üçün zəruri sosial-texniki infrastrukturu olan yeni yaşayış məhəlləsində 9 mərtəbəli 54 mənzilli 44 №-li yaşayış binasının tikintisi – 3 091 887.24 AZN

3.Abşeron rayonu ərazisində 1890 məcburi köçkün ailəsi üçün zəruri sosial-texniki infrastrukturu olan yeni yaşayış məhəlləsində 9 mərtəbəli 54 mənzilli 43 №-li yaşayış binasının tikintisi – 2 835 314.84 AZN

4.Sabirabad rayonunda fərdi yaşayış evlərinin təmiri – 297 100.05 AZN

5.Bakı şəhəri, Binəqədi rayonu, Xocasən qəsəbəsi ərazisində 810 məcburi köçkün ailəsi üçün zəruri sosial-texniki infrastrukturu olan yeni yaşayış məhəlləsində 9 mərtəbəli 54 mənzilli 1 №-li yaşayış binasının tikintisi – 3 245 418.09 AZN.

“Qaçqınkom”un iri layihələri 11 il fəaliyyət göstərməsinə baxmayaraq, tanınmayan bir şirkətə həvalə etməsi qurumun keçirdiyi tenderlərin şəffaflığını şübhə altına alır.

Hit.az