Şamaxının Göylər kəndinin sakini 66 yaşlı Təhminə Nuhova kənd bələdiyyəsinin qanunsuzluqlarından şikayətçidir. Deyir ki, bələdiyyə 1992-ci ildən istifadəsində olan 20 sot torpaq sahəsini başqa bir şəxsin adına rəsmiləşdirib:
“1992-ci ildən Göylər kəndinin ərazisində, evimizin 5 kilometrliyində, dağda özümüzə yer götürdük. Həmin yeri hasarladıq. 20 sot torpağı götürüb orada ev tikməyə hazırlıq gördük ki, ev tikək. Amma imkan olmadı deyə ev tikə bilmədim. Bütün Göylər camaatı bilirdi ki, ora mənimdir. Hər il orada otu biçib heyvanlarımıza verirdik. Oralar əldən-ayaqdan uzaq bir yerdir, yol-iz belə yox idi. Belimizdə hasarlamaq üçün materialı bir-bir ora daşımışdıq. Atam rəhmətə gedəndən sonra ev tikə bilmədim. İmkansızlıq da bizi zəif saldı. 2 il əvvəl Göylər bələdiyyəsinin sədri Nəbi Nəbiyevin yanına getdim. Ondan torpağa aid sənədləri istədim. Dedi ki, sənəd işi qəlizdir, gərək 1500 manat verəsən ki, yuxarılara çatdırım, sənə sənəd düzəlsin. Mən də lotereya oynadım, 500 manat yığdım, Nəbiyə zəng elədim. Dedi ki, 1500 manat olmasa, iş düzəlməz, sənəd verə bilmərəm. Ona yalvardım ki, pulu götür, sənədi hazırla, 1000 manatı da toplayıb verərəm. Pulu almadı”.
