Xankəndidən, Xocalıdan vaz keçdikmi?

Xankəndidən, Xocalıdan vaz keçdikmi - ermənilər mühasirədə və vahimədə

Azərbaycanın qarşısında dayanan əsas hədəflərdən biri də Xankəndi, Xocalı və Ağdarənin geri qaytarılmasıdır. Müxalifət və bəzi bolgerlər tez-tez deyirlər ki, hakimiyyət bu şəhərlərin adlarını çəkmir, demək, onları geri qaytarmaq planı yoxdur. Amma gedən proseslər və bəzi informasiyalar onu göstərir ki, prezident İlham Əliyev üçün Qarabağın işğaldakı digər ərazilərini qaytarmaq prioritet məsələdir. Dövlət bu hədəfdən vaz keçməyib, imtina etməyib. İlham Əliyevin rəqibləri iddia edir ki, o, Zəngəzur, Göyçə, İrəvan deməklə milləti Xankəndi, Xocalı hədəflərindən yayındırır. Fəqət gerçək müharibə kimi, soyuq müharibənin də özünün şərtləri, qaydaları var. Hazırda İlham Əliyev o şərtlərə tam olaraq əməl edir.

Qarabağda yaşayan erməni əhali Azərbaycan Ordusunun onları üzük qaşı kimi dövriyyəyə aldığını deyir və bundan ciddi narahatdırlar. AzadlıqRadiosu-nun erməni redaksiyasının bununla bağlı onlarla reportajı var.

İkinci əsas məqam hazırda Azərbaycan dövlətinin Qarabağda, Şuşada apardığı quruculuq-bərpa işləridir. Bunu bütün dünya izləyir. Ermənilər də həmçinin. Ermənilərin viran qoyduğu şəhərlər, kəndlər, rayonlar sürətlə bərpa edilir, infrastruktur yaradılır, yollar çəkilir, binalar, aeroportlar tikilir. Ermənilərin yaşadıqları, nəzarət etdikləri ərazilərdə isə rəzalət dizboyu... Enində-sonunda Qarabağın Azərbaycan vətəndaşı olan, hətta olmayan erməni əhalisi bu fərqi görüb, seçimlərini edəcəklər. Paşinyan hökumətinin onları hansı ağır şərtlərdə yaşatdıqlarını nəhayət anlayacaqlar.

Paralel olaraq, İlham Əliyev revanşistləri, Azərbaycana torpaq iddiasından əl çəkməyən Ermənistan hakimiyyətinin, hərbi mafiyanı “Dəmir yumruq”la yola gətirəcəyini, sındıracağını deyir. Dəfələrlə bildirib ki, Azərbaycanın haqlı, qanuni tələblərini icra etməsələr, başlarının üstündə dəmir yumruq görəcəklər.

Azərbaycan Ordusu müharibədən sonra ciddi təlimlər keçir. Bu təlimlər əsasən Türkiyə Ordusu ilə keçirilir. Türkiyənin ayrı-ayrı bölgələrində, Azərbaycan ərazilərində son aylar onlarla analoji təlimlər icra edilib. Bu da Ermənistan hakimiyyəti və cəmiyyəti üçün siqnaldı, xəbərdarlıqdır. Şərtlərə əməl edilmədiyi halda onları nələrin gözlədiyini bilməlidirlər. İlham Əliyev ölkəsinin sərhədlərini bərpa edir. Tarixi ədalətin və beynəlxalq qanunların prinsipi ilə aparır bu prosesi. Hədəflər o qədər böyük, miqyas o qədər nəhəngdir ki, bəziləri bunu anlamır. Hər adamın beyninin tuta, düşüncəsinin daşıya biləcəyi proses deyil axı.

Azərbaycan Ermənistanı rifah və güc mühasirəsində saxlayır. Onlara seçim imkanı verilib. Seçsinlər. Ya rifah içində, təhlükəsiz şəkildə yaşayacaqlar, ya da qismətləri dəmir yumruq olacaq. İstənilən halda qələbə Azərbaycanındır. Qarabağ Azərbaycanın olduğu kimi...

Azər Ayxan

Tarix: 1 Sentyabr 2021, 12:12

Xəbər lenti