Rusiya Federasiyası Ukraynaya hərbi müdaxilə olacağı təqdirdə həbslər və sui-qəsd kampaniyası planlaşdırır. Kremlin hazırladığı siyahılara Ukraynanın tanınmış siyasətçiləri, fəalları, Ukraynaya səfər etmiş Rusiya və Belarus dissidentləri daxildir. Bu barədə məlumatlı mənbələrə istinadən Amerikanın “Foreign Policy” nəşri yazıb.
Materialda deyilir ki, işğaldan sonra Rusiya tərəfi hədə-qorxu və repressiyalara əl atmaq niyyətindədir. Moskva əvvəlki kampaniyalarında dəfələrlə bu cür üsullardan istifadə edib. Jurnalın mənbələri iddia edir ki, ABŞ hakimiyyət orqanları bu məlumatı məqsədyönlü şəkildə ukraynalı tərəfdaşlarla və bu vəziyyətə təsir edə biləcək şəxslərlə bölüşürlər.
