“Dəfələrlə bu məsələni qaldırmışam ki, dərslər ayın ortası başlayıb, ortası bitə bilməz. Sentyabrın 1-də dərslər başlamalı, mayın sonunda bitməlidir. Bu uzatma, əlbəttə, istilərlə əlaqələndirilir. Amma 15 gün elə bir uzun vaxt deyil. ABŞ-ın sabiq prezidenti Barak Obama çıxışlarının birində təhsil məsələlərinə toxunanda belə demişdi: “Bilirsiniz niyə Koreyanın təhsili Amerika təhsilindən üstündür? Çünki koreyalılar 15 gün bizdən çox dərs keçirlər”. Guya yay məktəbləri fəaliyyət göstərir... Dərsliklər uşaqların əlindən alınır, yayda heç bir mütaliə edə bilmirlər. Bilmirəm, müəllimlər yorulurlar, yoxsa repititorlar? Bunu aydınlaşdırmaq lazımdır. Mənə belə gəlir ki, repititorlar yorulurlar. Onlar uzun müddət ödənişli şəkildə şagirdləri ali məktəbə hazırlaşdırırlar…”
Bu sözləri Pravda.az-a Milli Məclisin Elm və təhsil komitəsinin üzvü Etibar Əliyev deputat Fazil Mustafanın dərslərin sentyabrın 15-də deyil, 1-də başlaması ilə bağlı təklifindən danışarkən deyib.
