“Doğrudur, hazırda Rusiya-Ukrayna arasında olan münasibətlərin kəskinləşməsi zəminində müəyyən qədər taxılın qiymətlərində artımlar müşahidə edilir. Amma düşünürəm, bu, volatellik xarakter daşıyır. Yəni bir müddət sonra yenidən enmələr olacaq. Bütün hallarda 2022-ci ilin martından başlayaraq yaranmış qorxu, bu qorxunun yaratdığı yüksək qiymət artımı özünün pik həddinə 2022-ci ilin may ayının birinci yarısında çatıb. Hazırkı qiymət nə qədər qalxsa da, həmin müddətlə müqayisədə kifayət qədər aşağıdır”.
Bu sözləri Pravda.az-a açıqlamasında iqtisadçı-ekspert Eldəniz Əmirov deyib.
O bildirib ki, may ayındakı buğda qiymətinin formalaşacağına inanmır: “Düşünürəm, bir müddət sonra buğdanın qiymətlərində hazırkı eniş nisbətən azala bilər. Amma təbii ki, 2021-ci ilin qiymətlərinə nə zamansa gələcəyimizi də düşünmürəm. Çünki inflyasiyanın ümumi məqamı da, ümuminflyasiya meyilləri də buna imkan verməyəcək”.
Ekspert taxılın bahalaşmasının Azərbaycana təsirlərindən də danışıb: “Azərbaycanla bağlı hər hansı təhdid və təhlükənin olmasını gözləmirəm. Çünki dövlət məhz qida təhlükəsizliyi ilə bağlı artıq 2021-ci ilin ortalarından silsilə addımlar atmağa başlayıb. Həm ərzaq, həm taxıl ehtiyatlarının ehtiyatlarının formalaşmasında təkcə bu ilin yanvar ayında ötən illə müqayisədə dörd dəfədən artıq idxal həcmi həyata keçirib”.
Aytəkin Qardaşova
