“İqtisadiyyat və Sülh İnstitutu 2022-ci ilin Qlobal Sülh İndeksini açıqlayıb. Hesabatda daxili və xarici təhdidlər meyarlarına əsaslanan reytinqdə İslandiya, Yeni Zelandiya, İrlandiya, Danimarka, Avstriya ən dinc 5 ölkə kimi göstərilib. 163 ölkənin yer aldığı siyahıda Ermənistan 83-cü, Azərbaycan 128-ci, Rusiya 160-cı sırada qərar tutub. Qeyri-sabitliyin hökm sürdüyü, militarizasiya səviyyəsinin yüksək olduğu Ermənistanın bu hesabatda Azərbaycanı “qabaqlaması” təəccüb doğurur. Həmçinin Ermənistan kimi ölkənin siyahıda bu qədər önə, hətta Estoniya və Latviya kimi Avropa İttifaqı üzvü ölkələrinin yanında qərarlaşdırılması bu reytinq siyahısına şübhələrə yer açır və burada da erməni barmağının olduğunu söyləməyə əsas verir”.
Bu sözləri Pravda.az-a açıqlamasında Azərbaycan Naminə Alyans Partiyasının sədri Abutalıb Səmədov deyib
O bildirib ki, İqtisadiyyat və Sülh İnstitutunun açıqladığı 2022-ci ilin Qlobal Sülh İndeksi qətiyyən mötəbər və obyektiv hesab oluna bilməz: “Təəssüf doğuran budur ki, Ermənistan Azərbaycanı təkcə bu il xeyli qabaqlamayıb. Əgər belə olsaydı, bu nəticəni ermənilərin və bəzi “həmvətənlərimizin” əleyhimizə apardığı təbliğatla əlaqələndirmək və İnstitutun bu amilin təsirinə düşdüyünü düşünmək olardı. Ancaq bu İnstitutun “araşdırmalarında” Ermənistan torpaqlarımızın 20%-ni işğal altında saxladığı illərdə də Azərbaycandan daha “sülhsevər” olub və ölkəmizi xeyli qabaqlayıb. 2013-cü ildə işğalçı Ermənistan 98-ci, torpaqları işğal lunan Azərbaycan 126-cı, 2014-cü ildə Ermənistan 97-ci, Azərbaycan 123-cü, nəhayət, 2015-ci ildə Ermənistan 91-ci, Azərbaycan isə 132-ci olub. 2016-cı ildən sonrakı dövrü deməyə ehtiyac yoxdur. Çünki torpaqlarımız işğal altında ola-ola bizi sona yaxın sıralarda “şərəfləndirən” İnstitutun Aprel döyüşlərindən sonra daha arxa sıralara yerləşdirməsi “təbii” sayılmalıdır”.
