Azərbaycan gender bərabərliyinin təşviqi sahəsində bir sıra beynəlxalq təşkilatlarla yaxından əməkdaşlıq edir. Son illər Azərbaycan cəmiyyətində genderlə bağlı ciddi uğurlar əldə olunub. Artıq bu uğurları beynəlxalq qurumların hazırladıqları hesabatlarda da görmək mümkündür. Dövlətimiz tərəfindən bu sahəyə diqqət göstərilir. Lakin ailə münasibətlərini qanunla tənzimləmək mümkün deyil. Ailənin görünən və görünməyən tərəfləri ilə yanaşı, daxili, yalnız özünəməxsus qayda-qanunları mövcuddur. Bu gün ölkəmizdə gender bərabərliyinin təminatında qanunla yanaşı, insanları maarifləndirməyə ehtiyacı var.
Bu barədə Pravda.az-a açıqlama verən Sosioloq Əhməd Qəşəmoğlu bildirib ki, Azərbaycanda gender bərbərliyi ilə bağlı aydın, lazımlı bir fikir yoxdur.
Sosioloqun sözlərinə görə, “gender bərabərliyi” deyəndə çoxları statistikaya fikir verir: “Yəni harda qadınların sayı kişilərə nisbətən çoxdur, ailədə qadın və kişinin sözünə münasibət necədir və s. Bütün bunların hamısı qeyri-dəqiq yanaşmalardır. Hansısa vasitədən istifadə ediriksə, hər zaman düşünməliyik ki, onu hansı məqsəd üçün istifadə edirik. Əsas vacib olan məqsəddir. Məqsədimiz bu deyil ki, Azərbaycanda gender bərabərliyi statistik anlamda yüksək səviyyədə olsun. Biz də hesabat verib deyək ki, Azərbaycanda müxtəlif sahələrdə gender bərabərliyi Fransada, Belçikada deyildiyi kimidir. Fransa, yaxud Belçikada “gender bərabərliyi” dedikdə nəzərdə tutulan prinsiplər Azərbaycanda ziyanlı rol oynaya bilər. Ona görə də biz əvvəlcə öz cəmiyyətimizin mahiyyətinə uyğun gender bərabərliyinin nə olduğunu aydınlaşdırmalıyıq. “Azərbaycanda gender bərabərliyi dünyanın hər yerində olduğu kimidir” demək bizə lazım deyil. Bizə əsas lazım olan budur ki, ailəmizdə daha ahəngdar münasibət olsun. Gender bərabərliyini müqayisə etdiyimiz ölkələrin təcrübəsindən necə istifadə edək ki, ailələrimizdə daim ahəngdar münasibət qorunsun, sabah ailələr dağılmasın, ailə zəminində zorakılıq, qətl hadisələri, boşanmaya gətirib çıxarmasın. Deməli, biz məqsədi önə çəkməliyik, vasitə isə ikinci sırada olmalıdır”.
Ə.Qəşəmoğlu xarici ölkələrdən ailədə gender bərabərliyi ilə bağlı nümunə gətirib: “Belçikada ər və arvad arasında evlənərkən müqavilə bağlanır, zibili kim atacaq, paltarı kim yuyacaq və s. Bu, Azərbaycan üçün gülünc və ailəni dağıdacaq modeldir. Azərbaycanda gender bərabərliyini faydalı vasitə kimi istifadə etmək üçün xeyli tədqiqat aparmaq lazımdır. Elmi tədqiqatlar, araşdırmalar aparmadan Azərbaycanda fəhmlə gender bərabərliyindən danışmaq düzgün olmaz. Baxmalıyıq ki, bu məsələ Bakıda, Lerikdə, Bərdədə və s. necədir. Fərqli olmalıdır. Bakı və Lerikdə eyni prinsip ola bilməz. “Gender bərabərliyi” yox, “gender münasibətləri” desək, daha dəqiq olar. Bu münasibətlər ayrı-ayrı bölgələrimizdə fərqli ola bilər. Hətta Bakının kəndlərində, rayonlarında da. Deməli, biz bu sahəni yaxşı öyrənməliyik. Müasir metodlar var. Sorğular da keçirmək, söhbət aparmaq olar və s. Yalnız bu cür tədqiqat apardıqdan sonra deyə bilərik ki, Azərbaycanın hansı ərazisində gender münasibətləri aruzolunan şəkildədir. Azərbaycanda gender bərabərliyinə bir çox hallarda mexaniki, avtomatik yanaşılır. Bu, arzuolunan səviyyədə deyil”.
Psixoloq Gülnar Orucova isə deyib ki, ailədə kişi və qadın bərabər hüquq daşıyır:
