Ekoloji təhlükəsizliyin təmin olunması üçün ətraf mühitin çirklənməsinin qarşısının alınması, bu sahədə işlərin təkmilləşdirilməsi Azərbaycan dövlətinin ekoloji siyasətinin əsas istiqamətlərindən biridir. Ekoloji məsələlər ümumbəşəri problem kimi qəbul olunur. Hazırda bütün dünyada ekologiyanın mühafizəsi ən aktual məsələdir.
Mövzu ilə bağlı Pravda.az-a danışan Milli Məclisin Təbii ehtiyatlar, energetika və ekologiya komitəsinin üzvü Nəsib Məhəməliyev bildirib ki, Azərbaycanda ekologiya və ətraf mühitin qorunması üçün dövlət tərəfindən məqsədyönlü siyasət həyata keçirilir.
Deputat deyib ki, Bakı şəhərinin ekoloji mühitinin müsbət yöndə dəyişdirilməsi, sağlamlaşdırılması üçün yaşıllıqlar salınır: “Məişət tullantılarının təkrar emalı istiqamətində kifayət qədər xeyli addımlar atılıb. Cənab Prezidentin təşəbbüsü ilə Balaxanıda bərk məişət tullantılarının çeşidlənməsi zavodu ölkədə təkrar emal sahəsini inkişaf etdirmək məqsədilə inşa edilmişdir. Eyni zamanda respublikanın bütün şəhər və rayonlarında yaşıllıqlar salınır, yeni meşə örtüyü bərpa olunur, meşələrin təbii bərpası istiqamətində çoxlu sayda məqsədyönlü proqramlar həyata keçirilir, yaşıllaşdırılma prosesi il boyu davam etdirilir. Birinci vitse prezident Mehriban Əliyevanın təşəbbüsü ilə “Hərəyə bir ağac əkək” layihəsi çərçivəsində ölkə ərazisində milyonlarla ağac əkildi. İşğaldan azad olunmuş torpaqlarımızda ermənilərin törətdikləri vəhşiliklər nəticəsində ekologiyamıza dəymiş ziyan aradan qaldırılır. Qarabağda yeni meşə zolaqları, akvaparklar salınır. Ekologiyanın tərkib hissəsi olan yeraltı və yerüstü su hövzələrinin idarə olunması istiqamətində işlər həyata keçirilir. Ənənəvi enerji istehsalı ilə bağlı alternativ və bərpa olunan enerjiyə böyük üstünlük verilir. Getdikcə respublikanın ümumi elektrik enerjisinin təminatı strukturunda alternativ yaşıl enerjiyə keçid istiqamətində yeni elektrik stansiyaları inşa olunur. Məişət tullantılarının axar sulara tullanmasının qarşısı alınır, sənaye müəssilərində Xəzərin çirklənməsinin qarşısının alınması istiqamətində tədbirlər həyata keçirilir”.
N.Məhəməliyev deyib ki, transsərhəd çaylarımız Ermənistan tərəfindən çirkləndirilib: “Oxçuçay Ermənistan ərazisində daim kəskin çirklənməyə məruz qalır. Oxçuçayın Cənubi Qafqazın ikinci böyük çayı olan Araz çayına töküldüyünü nəzərə alsaq, onun çirklənməsi Araz çayının su ehtiyatlarının keyfiyyətinə də birbaşa təsir göstərir. Araz çayı Kür çayının ən böyük sağ qolu olmaqla Ermənistanla digər transsərhəd çaydır və Azərbaycanın əkin sahələrinin suvarılmasında həlledici rol oynayır. Transsərhəd çayların zəhərlənməsinin qarşısının alınması məqsədilə beynəlxalq təşkilatlar qarşısında məsələlər qaldırılır. Ekoloji və ətraf mühitə münasibət problemləri bəşəri problemlərdir. Bu, təkcə hansısa ölkənin vəzifəsi deyil. Bu problemlərlə dövlətlər, eyni zamanda hər bir fərd, vətəndaş harada yaşamasından asılı olmayaraq ciddi məşğul olmalıdır”.
Deputat bildirib ki, dünyada baş verən iqlim dəyişiklikləri, getdikcə istiləşmə fonunda səhralaşma prosesləri gedir: “Təxminən, orta hesabla hər 12-15 kilometr ərazidə Şimala doğru səhralaşma prosesi gedir. Bu da ekoloji problemlərlə yanaşı iqtisadi problemlərlə nəticələnir, əhalinin sosial vəziyyəti ağırlaşır, ərzaq təhlükəsizliyi məsələləri ən qabarıq şəkildə özünü göstərir. Şimal, eyni zamanda Cənub qütbündə, Arktikada, Antraktidada daimi buzlaqların əriməsinə səbəb olur. Bu da dünya okeanında suyun səviyyəsinin kəskin şəkildə qalxmasına səbəb olur və bərabərində təbii fəlakətlər, sel, torpaq uçqunları gətirir, ümumi planetimizin, ekoloji mühitin korlanması ilə nəticələnir. Qafqaz regionunun, xüsusilə Cənubi Qafqazın ekoloji mühitinə mənfi təsir göstərən, Ermənistan ərazisindəki “Metsamor” atom elektrik stansiyasıdır. Baxmayaraq ki, artıq bu stansiya istismar müddətini keçib, köhnə SSRİ texnologiyası ilə işləyən AES-dir. Bu stansiyanın bağlanması ilə bağlı Avropa İttifaqının da qərarı var. Lakin buna baxmayaraq, Ermənistan hökuməti bu stansiyanın istismar müddətini dəfələrlə müxtəlif bəhanələrlə uzadır. Bu da regionun ekoloji mühitinə mənfi təsir göstərir. Bu səbəbdən cənab Prezident ekoloji mühitin sağlamlaşdırılması, ətraf mühitin mühafizəsi istiqamətində çox ciddi addımlar atır, dövlət siyasətini istiqamətləndirir ki, Azərbaycanda maksimum ekoloji sağlam mühit yaransın. Bu isə insanların sağlamlığı, onların yaşayış tərzinin yaxşılaşdırılması, xəstəliklərin azalması ilə nəticələnir. Hesab edirəm, Azərbaycan dövləti ekoloji və ətraf mühitin mühafizəsi istiqamətində qlobal mənada öz töhfəsini verir”.
