“Azərbaycanlı din xadimlərinin İranın əleyhinə bu gün heç bir söz deməmələrini onlara irad tutmuram. Normaldır. Çünki din xadimlərinin öz işləri var. Onlar siyasi xadim deyillər. Dırnaqarası siyasi xadimlərimiz çoxdur. Bəzən öz güclərinin çatmadığı şeylərdən danışırlar. Hər gün bar-bar bağırırlar, qəzetlərdə, televiziya kanallarında hadisələri şərh edir, İrana qarşı ittihamlar irəli sürürlər. Bunlar bizim də xeyrimizə deyil. Azərbaycanın dövlət siyasəti İranla dostluq münasibətlərini, iqtisadi, mədəni əlaqələri saxlamağa yönəlikdir. Din xadimlərini İrana qarşı etiraz səslərini ucaltmağa çağırmalı deyilik. Dövlət var, dövlətin bu sahədə işləyən qurumları var. Məsələləri onlar həll etməlidirlər. Allah eləməsin, İranla aramızda müharibə baş verərsə, onda din xadimlərinə müharibəyə qoşulmaları ilə bağlı çağırış edərik. Bütün bunlar xəyaldır, fantaziyadır. Din xadimləri siyasətə qarışmalı deyillər”.
Bu sözləri Pravda.az-a açıqlamasında Dini Qurumlarla İş üzrə Dövlət Komitəsinin sabiq sədri Rafiq Əliyev deyib.
R.Əliyev düşünür ki, Azərbaycandakı dindarları da siyasi partiyalar kimi İranın üzərinə qaldırsaq, onlar da İranı tənqid etsələr, bu, iki ölkənin, iki xalqın mənafeyinə uyğun gəlməz: “İranın daxilində indi vəziyyət onsuz da gərgindir. Bunu bir az da gərginləşdirmək fürsətdən istifadə etməyimiz kimi anlaşılar. Aydındır, bu, İranda yaşayan azərbaycanlılara dəstək vermək anlamındadır, belə bir dəstək verə bilərik. Amma İranın daxili işlərinə qarışmaq bizim üçün sərfəli deyil, bizə yaraşmaz. Buna cəhd edənlər düşünürlərsə ki, İranın daxili işlərinə qarışmağımız üsyankar insanları hakimiyyətə gətirə biləcək, fikirləşməsinlər. İran azərbaycanlılarının böyük əksəriyyəti Tehranda yaşayır. Onlar İranda demokratik bir Azərbaycan qurmaq fikrində deyillər. Bunu dəfələrlə deyiblər. İran azərbaycanlıları hələ Səttar xanın vaxtından İranda demokratik dövlət qurmaq istəyirdilər. Yəni siyasi rejimi, sistemi dəyişməklə farslarla azərbaycanlıların eyni yaşadıqları yerdə demokratik dövlət qurmaq. Biz istəyirik ki, İran azərbaycanlıları özləri üçün orada azadlıq əldə etsinlər, respublika qursunlar və s. Lakin bu, İran azərbaycanlıları içərisində çox güclü qırğınlara gətirib çıxaracaq. Bu üsyanın, inqilabın onlara xeyri olmayacaq. İnqilab hər şeyi dağıtmaq və yenidən qurmaqdır. Oradakı azərbaycanlıların isə buna elə bir böyük imkanları yoxdur. Ona görə də bu gün İranla münasibətlərimiz normal olmalıdır. Azərbaycan inkişaf edən ölkədir. Müəyyən səviyyəyə gəlib çatıb. Dünya dövlətləri sırasında nüfuzu var. Bütün bunları nəzərə alaraq, qonşu İranla müharibə vəziyyətinə gətirib çıxarmaq düzgün deyil, zərərdir”.
