“Rusiya Prezidentinin vasitəçiliyi ilə Azərbaycan və Ermənistan liderlərinin Soçidə keçirilən görüşü əvvəlcədən gözlənildiyi kimi nəticəsiz başa çatdı. İmzalanan bəyanatda, demək olar ki, ciddi sayılacaq heç bir müddəa yoxdur və daha çox Rusiya liderinin “diplomatik fiaskosunu” ört-basdır etməyə xidmət edir. Soçi görüşü Rusiya dövlətinin nə qədər acınacaqlı durumda olduğunu və reallıq hissini tamamilə itirdiyini bir daha ortaya qoydu. Əslinə qalsa, bu reallığı biz Vladimir Putinin “Valday” forumundakı məntiqsiz və açıq təxribat xarakterli çıxışında artıq hiss etmişdik”.
Bu sözləri Pravda.az-a açıqlamasında Azərbaycan Naminə Alyans Partiyasının sədri Abutalıb Səmədov deyib.
O bildirib ki, Ukrayna cəbhəsində ağır duruma düşən, dünyada “çıxdaş” vəziyyətinə salınan, bunun nəticəsində ABŞ-ın və müttəfiqlərinin Cənubi Qafqazda kəskin şəkildə fəallaşmasına imkan yaradan Rusiya lideri Azərbaycanın gücünü nəzərə almadan forumda Ermənistanın maraqlarına cavab verən “konsepsiyanın” müəyyən elementlərini səsləndirdi:
“Bununla da son aylar xüsusi nümayəndə İqor Xovayevin tərəflərə təqdim etdiyi bədnam “baza prinsiplərinin” ermənilərin maraqlarına xidmət etdiyini əsaslandırmağa çalışdı. Prosesləri izləyən hər kəs həmin məqamda anladı ki, Rusiyanın vasitəçilik təşəbbüsünü yenidən ələ almaq təşəbbüsü heç bir nəticə verməyəcək və sülh sazişi onun vasitəçiliyi ilə imzalanmayacaq. Praqa görüşündə üç fransıza (Ermənistan özünü fransız dilli ölkə sayır və Frankofoniya təşkilatının üzvüdür) qarşı təkbaşına dayanmağı və öz tələblərini qəbul etdirməyi bacaran Azərbaycan Prezidenti bu dəfə Soçidə “iki rus”a qarşı eyni qətiyyəti göstərdi və erməni-rus ittifaqının planlarını darmadağın etməyi bacardı. İkili danışıqlarda həm Putinin, həm də Nikol Paşinyanın bəyan etdikləri heç bir məsələ imzalanan bəyanatda öz əksini tapmadı və bu “dişsiz” sənəd reallıq hissini itirmiş Rusiya liderinin nüfuzunun hansı səviyyəyə düşdüyünü bütün dünyaya nümayiş etdirdi”.
Partiya sədri Soçi görüşündən sonra keçirilən mətbuat konfransından da danışıb:
“Bu biabırçılıqla kifayətlənməyən Putin hələ bir mətbuat konfransı da keçirmək qərarına gəldi və həmin konfransda Rusiyanın vasitəçilik missiyasının “tabutuna” son mıxları vurdu. Üçtərəfli görüş barədə “danışmaq olar, ancaq lazım deyil” deyən Rusiya lideri tədbirlə əlaqəsi olmayan bir neçə suala cavab verib mətbuat konfransını yekunlaşdırdı. Şübhə yoxdur ki, Rusiya bu “fiasko” ilə barışmayacaq və həm sərhəddə, həm də Qarabağda daha ciddi təxribatlar törətməyə cəhd göstərəcək. Bu səbəbdən qətiyyən arxayınlaşmamalı və bu təxribatların qarşısını almaq üçün ən yüksək hazırlıq vəziyyətində olmalıyıq. Unutmamalıyıq ki, 90-cı illərin Rusiyası geri qayıdır və ondan hər cür təxribat, xəyanət gözlənilə bilər”.
Aytəkin Qardaşova
