“Yeni Azərbaycan Partiyasının 30 illik yubiley mərasiminə qatıldığımıza görə bizi tənqid edən partiyalar bizə ağıl öyrədə, yol göstərə bilməzlər. Çünki onların nə buna mənəvi haqları çatır, nə də siyasi təcrübləri imkan verir. Hər kəsin fəaliyyəti cəmiyyətin gözü qarşısındadır, cəmiyyət də qiymət verir. Hər siyasi partiyanın öz marağı, mənafeyi var və şübhəsiz ki, milli maraqlarla uyğunlaşdırılmış şəkildə fəaliyyət göstərməlidir. Heç bir partiya başqa partiyaya yol göstərməməlidir. İrada qalsa, bizim də həmin partiyaların tutduğu yolla bağlı çoxlu iradlarımız var. Onların tutduqları mövqeyi də, yolu da qəbul etmirik. Bu, o demək deyil ki, bizə ağıl öyrətməlidirlər, yaxud biz onlara. Onlar bildikləri yolla getsinlər, biz də öz bildiyimiz yolla gedirik”.
Bu sözləri Pravda.az-a açıqlamasında Ədalət Partiyasının sədr müavini Elxan Şükürlü deyib.
O bildirib ki, Ədalət Partiyası Vətən müharibəsi başlayan andan ilk bəyanat verib, “hakimiyyətlə düşmənə qarşı eyni səngərdə, cinahdayıq” deyən partiyalardan biridir: “Müharibə dönəmindən başlayaraq son iki il ərzində davamlı şəkildə bu bəyanatımıza, kursumuza sadiqik. Hazırda ölkəyə çox böyük xarici basqılar var. Belə bir ərəfədə içəridə “müxalif marağı” adı altında qarışdırıcı fəaliyyətlə məşğulluq doğru deyil, yanlışdır. Bu dəqiqə cəmiyyətimizin daha çox birliyə, həmrəyliyə ehtiyacı var. Prezident Administrasiyasında yaradılan yeni Siyasi partiyalar və qanunvericilik hakimiyyəti ilə əlaqələr şöbəsinin son iki ildə bizim də təqdir etdiyimiz fəaliyyətlərindən biri müxalifətə münasibətin dəyişməsidir. Administrasiyada əvvəlki adamlardan fərqli olaraq, bunlar artıq müxalifət partiyaları ilə görüşür, onların fikirlərini alır, dinləyirlər. Hamının arzusudur ki, cəmiyyətdə xüsusən milli məsələlərdə iqtidar-müxalifət həmrəyliyi olsun. Addım-addım da buna nail olunur. Dünənə qədər YAP-ın qurultaylarında bizi tənqid edirdilərsə, belə ali tədbirlərin hamısında müxalifətin ünvanına sərt fikirlər işlədilirdisə, artıq görürük ki, bu fikirlərdən də imtina olunur, bu meyillər aradan götürülür. Bunun nəyi pisdir? Sadəcə bir qrup var ki, onların məqsədləri qarışıqlıq, fitnəkarlıq salmaqdır. Onlar cəmiyyətimizdə birliyin, həmrəyliyin, iqtidarla müxalifət arasında siyasi barışın olmasını istəmirlər. Çünki onların əksəriyyəti xaricdən asılı siyasi təşkilatlardır - həm siyasi, həm də maliyyə asılılıqları var. Cəmiyyətdə birliyin əleyhinə olanların ən çox da onlardır. Belə addım atdıqda, əlbəttə, çalışacaqlar ki, tənqid etsinlər, gözdən salsınlar. Amma onların bu tənqidləri bizi yolumuzdan döndərə bilməz”.
