BURADA REKLAMINIZ OLA
BİLƏR

BURADA REKLAMINIZ OLA
BİLƏR

SOCAR əməkdaşlarını maşınla vurub öldürən şəxslə bağlı QƏRAR

Bakı Apellyasiya Məhkəməsində yol qəzasında 2 nəfərin ölümündə təqsirləndirilən İbrahim Əsədzadənin barəsindəki hökmdən verilən apellyasiya şikayətinə baxılıb.

 

Pravda.az-ın əldə etdiyi məlumata görə, hakim İbrahim İbrahimlinin sədrlik etdiyi prosesdə qərar elan olunub.

 

Qərara əsasən, birinci instansiya məhkəməsinin qərarı dəyişdirilmədən, apellyasiya şikayəti isə təmin edilmədən saxlanılıb.

 

Qeyd: Hadisə bu il aprelin 27-də gecə saat 03:15 radələrində Qaradağ rayonu Ələt qəsəbəsində qeydə alınıb.

 

Belə ki, 1995-ci il təvəllüdlü Əsədzadə İbrahim Qaraş oğlu idarə etdiyi “Chevrolet” markalı avtomobillə yol kənarında dayanmış şəxsləri vuraraq öldürüb.

 

Hadisə vaxtı Ramazan ayı ilə əlaqədar SOCAR-da işləyən 1984-cü il təvəllüdlü Qurbanov Emil Məhəmməd oğlu və 1967-ci il təvəllüdlü Cəfərov Səyavuş Əyyub oğlu “Mercedes” markalı avtomobili yol kənarında saxlayıblar. Onlar maşından düşərək baqaj hissədə sahur yeməyi yeməyə başlayıblar. Bu zaman İ.Əsədzadə nəqliyyat vasitəsini idarəetmə hüququ olmadan idarə etdiyi “Chevrolet Camaro” markalı, 99-PC-811 dövlət qeydiyyat nişanlı nəqliyyat vasitəsini yol kənarına çıxararaq onlara çırpıb. Nəticədə E.Qurbanov və S.Cəfərov hadisə yerində ölüb.

 

Araşdırmalar zamanı məlum olub ki, qəzada həlak olan şəxslər gecə vaxtı SOCAR-ın Təhlükəsizlik İdarəsində əməkdaşları yoxlamağa gedirmiş. Hadisə vaxtı onların yanında digər əməkdaş da olub. Həmin şəxs təsadüf nəticəsində sağ qalıb.

 

Məhkəmədə İ.Əsədzadə hadisə vaxtı dostunun kirayə götürdüyü “Chevrolet Camaro” markalı avtomobili sürdüyünü, həmin hadisədən əvvəl Şirvan şəhərinə getdiyini və qısa vaxt sonra yenidən Bakı istiqamətinə geri qayıtdığını bildirib. O deyib ki, Ələtə çatanda avtomobilin GPRS (radiorabitə) sistemi qəfil söndürülüb və nəticədə maşın idarəetmədən çıxıb.

 

Vəfat edən şəxslərin ailə üzvləri hadisəni törədən sürücüyə ağır cəza verilməsini xahiş ediblər.

İ.Əsədzadə Cinayət Məcəlləsinin 263-1.4-cü (Yol hərəkəti və ya nəqliyyat vasitələrinin istismarı qaydalarını sürücülük hüququ olmayan şəxs tərəfindən pozma – 2 və ya daha artıq şəxsin ölümünə səbəb olduqda) maddəsi ilə təqsirləndirilib.

 

Bakı Ağır Cinayətlər Məhkəməsinin hökmü ilə 27 yaşlı İ.Əsədzadəyə 4 il müddətinə sürücülük hüququndan məhrum edilməklə, 10 il həbs cəzası verilib.

 

Kamal Məmmədov

Tarix: 23 Noyabr 2022, 18:43   
-->
Xəbər lenti
Çox oxunanlar

Ən son xəbərləri səhifəmizdən də izləyin