Azərbaycanda avtomobil icarəsi şərtləri necədir?

Bu günlərdə Böyük Britaniyada dünyanın 58 ölkəsində avtomobil icarə qiymətləri ilə bağlı araşdırma aparılıb. Araşdırma zamanı müəyyən edilib ki, dünyada Azərbaycan avtomobil icarəsi ən ucuz olan ölkələr siyahısındadır. Belə ki, hesablamalara görə, Azərbaycanda 305,21 ABŞ dollarına bir həftəlik avtomobil icarəyə götürmək olar.

Bəs real vəziyyət necədir?

Pravda.az xəbər verir ki, avtomobil icarəsi sahəsində fəaliyyət göstərən şirkətlərdən birinin nümayəndəsi Nahid Əliyevin sözlərinə görə, sürücülük vəsiqəsi olan 25-65 yaşlı hər kəs, avtomobil icarəyə götürə bilər. Avtomobil icarəyə götürən zaman şəxsiyyət vəsiqəsi və sürücülük vəsiqəsi (maksimum 3 il təcrübə) tələb edilir. Avtomobillər minimum 2 günlüyünə götürülə bilər.

“Müqavilə imzalanır və müştəri avtomobili götürür. Həmin dəqiqədən avtomobil icarədə hesablanır. Sürücü avtomobili bir neçə saat gec gətirsə, ondan növbəti günün haqqı tələb edilir. Avtomobil icarəyə götürüldüyü müddətdən tez qaytarılsa, ödənilən icarə haqqı geri qaytarılmır. İcarə haqqı öncədən ödənilir”,- deyən N.Əliyev bildirib ki, avtomobilin icarə haqqı ilə birlikdə müştəridən avtomobilin markasından asılı olaraq 300-500 manat depozit götürülür. Bu depozit, avtomobil saz vəziyyətdə qaytarıldığı zaman müştəriyə qaytarılır.

“Avtomobillər saz vəziyyətdə müştəriyə təqdim edilir. Bütün avtomobillərin icbari və kasko sığortası var. Avtomobillər ancaq ölkə ərazisində sürmək olar. Ölkədən çıxmağa icazə verilmir”,- deyən həmsöhbətimiz həmçinin qeyd edib ki, avtomobillərdə spirtli içki içilməsinə və ya siqaret çəkilməsinə icazə verilmir.

Müştəri icarə avtomobil üçün müraciət etdiyi zaman müqavilə şərtləri ilə tanış olur. Razı olmadığı hərhansı bir müddəa olarasa, müqaviləni imzalamaya bilər. Avtomobil icarədarı həmçinin bildirib ki, avtomobillərin icarə haqqı markasından və buraxılış ilindən asılı olaraq dəyişir. Məsələn, 50 manata da kirayə avtomobil götürmək olar, 1000 manata da. Bu qiymətlər avtomobilə görə dəyişir.

N.Əliyev həmçinin bildirib ki, şirkətə avtomobillər ayrı-ayrı sahibkarlar tərəfindən təqdim edilməklə yanaşı, şirkətə məxsus avtomobillər də var: “Azərbaycanlılar daha az müraciət edir. Əsasən xarici qonaqlar avtomobil icarəsi üçün müraciət edir. Azərbaycanda isə, buna daha çox gənclər meyllidir. Bəzən bölgələrə istirahətə getmək üçün avtomobil götürülər. Bizdə avtomobillərin icarə qiymətləri 50 manatdan başlayır. Avtomobillər bir aylıq götürüldüyü zaman qiymətdə az miqdarda güzəşt edilir”.

Hesablamalar göstərir ki, Azərbaycanda avtomobil icarəsi daha ucuzdur. Yəni Britaniyanın hesablamaları reallığı əks etdirmir...

Bizimyol.info