“Mənimsəmə cinayətləri mənimsənilən məbləğin dəyərindən asılı olaraq cinayət tərkibi yaradır. Eyni zamanda məbləğdən asılı olaraq cəza sanksiyasi daha da ağırlaşır. Belə ki, Azərbaycan Respublikasının Cinayət Məcəlləsinin 179-cu maddəsində mənimsəmə cinayəti nəzərdə tutulur. Əgər mənimsənilən məbləğin dəyəri 5 min manatdan 50 min manata qədərdirsə, o halda 179.2.4-cü maddəsi ilə iki ildən beş ilədək, 50 min manatdan 500 min manatadək olan məbləğdirsə, bu zaman cinayət məcəlləsinin 179.3.2-ci maddəsi ilə beş ildən on ilədək, xüsusilə külli miqdardırsa, yəni 500 min manatdan çoxdursa, məcəllənin 179.4-cu maddəsi ilə on ildən on dörd ilədək azadlıqdan məhrum etmə cəzası nəzərdə tutulur”.
Bunu Pravda.az-a hüquqşünas Seymur Yusifli sabiq Nəqliyyat naziri Ziya Məmmədovun Bakı-Quba yolunun çəkilişi zamanı mənimsəmə faktları təsdiqlənəcəyi halında mümkün cəzaları şərh edərkən bildirib.
