Həyata keçirilən davamlı tədbirlər, layihələr sayəsində respublikamızda əlverişli biznes mühiti formalaşıb. Güclü dövlət siyasəti ölkəmizdə digər sahələr kimi, azad sahibkarlığın və liberal iqtisadiyyatın inkişafına da təkan verib. Sahibkarlığın sürətli inkişafını təmin etmək üçün dövlət sahibkarlıq fəaliyyətinin öncül istiqamətlərini və buna müvafiq olaraq düzəlişlər sistemini müəyyənləşdirir. Ölkədəki belə əlverişli şəraitdən bəhrələnən sahibkarlar isə müxtəlif sahələrə investisiya qoyuluşunu artırmağa böyük maraq göstərirlər. Respublikada özəl bölmənin dinamik inkişafını təmin etmək məqsədilə həyata keçirilən islahatlar beynəlxalq səviyyədə də yüksək dəyərləndirilir.
Bu barədə Pravda.az-a açıqlama verən iqtisadçı-ekspert Eldəniz Əmirov bildirib ki, ölkədə azad sahibkarlığın və liberal iqtisadiyyatın qurulması üçün müəyyən addımların atıldığı müşahidə edilir:
“Görünən odur ki, liberal iqtisadiyyatın qurulması nəzərdə tutulan səviyyədə öz effektivliyini göstərməyib. Bunun bir sıra obyektiv və subyektiv səbəbləri var. Uzun müddətdir ki, ölkədə Rəqabət Məcəlləsinin qəbul edilməməsi başlıca səbəblərdəndir. Bu məsələnin yenidən gündəmə gəlməsi sevindirici haldır. Bir neçə gün öncə verilən məlumatlara görə, artıq ciddi şəkildə irəliləyiş əldə olunub. Bu məcəllə hazırlanıb və müəyyən proseslərdən sonra ölkədə liberal iqtisadiyyatın formalaşmasına töhvəsini verəcəyini görə biləcəyik. Hər halda gözləntilərimiz budur. Nəticənin necə olacağını isə zaman göstərəcək. Bu məcəllənin qəbul olunması sahibkarlıq sahəsinin inkişafı istiqamətində atılmış ən ciddi effekt verən addım olacaq”.
Ekspert deyib ki, bəziləri istisna olmaqla, əksər bölgələrdə sahibkarlıq çox zəif inkişaf edib: “Müasir texnologiyaların tətbiq edilməməsi, kredit faizlərinin yüksək olması sahibkarlığın fəaliyyətini əngəlləyən əsas səbəblərdir. Düşünürəm, bu sahədə dövlətin dəstək mexanizmləri var. Sahibkarlığın inkişafından danışarkən KOBİA-nın adını çəkməmək olmaz. Çünki ölkədə sahibkarlıq subyektlərinin dəstəklənməsində, inkişafında KOBİA-nın fəaliyyəti çox böyükdür. Həm təşviq, həm dəstək mexanizmləri, regionlarda fəaliyyət göstərən “KOB Dostu” mexanizmi vasitəsilə sahibkarlara dəstək olan bir nömrəli qurum KOBİA-dır”.
Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev deyib ki, təşviqlə bağlı Azərbaycanda İxracın və İnvestisiyaların Təşviqi Fondu - AZPROMO fəaliyyət göstərir:
