Şəki Ağır Cinayətlər Məhkəməsində piyadanı vurub öldürərək hadisə yerindən qaçmaqda təqsirləndirilən Xəyyam Yusubovun cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Rafail Əliyevin sədrliyi ilə keçirilən prosesdə hökm oxunub.
Məhkəmənin hökmü ilə o, 5 il 1 ay müddətinə azadlıqdan məhrumetmə cəzasına məhkum olunub.
Hökmdə qeyd edilib ki, Şəki Apellyasiya Məhkəməsinin 2020-ci il tarixli qərarı ilə təqsirləndirilən şəxs 2 il müddətinə şərti olaraq tətbiq edilmiş 10 ay 15 gün müddətə azadlıqdan məhrumetmə cəzası müstəqil icra edilsin. Xəyyam Yusubov cəzasını ümumi rejimli cəza çəkmə müəssisəsində çəkəcək.
Cəza çəkmə müddətinin başlanğıcı şübhəli şəxs kimi tutulduğu 08 sentyabr 2021-ci il tarixdən hesablanıb.
Təqsirləndirilən şəxs əlavə cəza kimi təyin edilmiş 3 il 6 ay müddətinə nəqliyyat vasitələrini idarə etmək hüququndan məhrumetmə cəzası ona təyin edilmiş əsas cəzanın çəkildiyi bütün müddətə və bundan əlavə hökmdə müəyyən edilmiş 3 il 6 ay müddətə şamil olunub.
