Bakıda arvadını öldürməyə cəhddə təqsirləndirilən Namiq Rəsulovun məhkəməyə verdiyi ifadəsi məlum olub.
Pravda.az-ın xəbərinə görə, Bakı Ağır Cinayətlər Məhkəməsinin hakimi Əli Məmmədovun sədrliyi ilə keçirilən prosesdə o, ona elan edilmiş ittiham üzrə qismən təqsirli bilib.
Namiq Rəsulov dindirilən zaman deyib ki, 2004-cü ildə zərərçəkmiş şəxslə - həyat yoldaşı Fərqanə Rəsulova ilə “Çinici” mağazasında birlikdə işləyən zaman tanş olub və həmin vaxtdan da bir-birlərini sevib evləniblər:
“Evləndikdən sonra çox mehriban yaşayırdıq. Bizim birgə nikahdan bir qız və bir oğlan övladımız doğuldu. Fərqanəni çox sevirdim və hazırda da sevirəm. Heç vaxt Fərqanənin xətrinə dəyməmişəm. Mən bir ailə başçısı kimi həmişə ona dəstək olmağa və həya yoldaşımı xoşbəxt etməyə çalışmışam. 2020-ci ilin əvvəllərində Fərqanə mənim telefonunda vatsapda başqa bir qadınla yazışmamı gördü. Həmin vaxtdan etibarən o, mənim bu yazışmamı özünə xəyanət kimi qəbul etdi. Bundan sonra bizim münasibətlərimiz soyudu. Mən öz səhvimi başa düşərək dəfələrlə Fərqanədən üzr istədim. Lakin səhvim Fərqanəyə çox pis təsir etdiyindən o, məni bağışlamaq istəmədi. Bu minvalla aramızda soyuqluq yarandı. Mən dəfələrlə Fərqanə ilə barışmağa cəhd etsəm də, o, rədd edirdi. Lakin bu müddət ərzində bir evdə yaşayırdıq. 2021-ci ilin mart ayında Fərqanə qadınlar üçün nəzərdə tutulan idman zalında (pilates mərkəzində) işə düzəldi. Onun işi ürəyimcə olmadı. Mən Fərqanənin həmin yerdə işləməsini istəmədim. Amma arvadım orada işləmək istədiyindən mən yenə də Fərqanənin xətrinə dəymədim və çalışmasına etiraz etmədim.
Sonra Fərqanə tez-tez məndən küsürdü və uşaqları da götürüb acıq edib anasıgilə gedirdi. 2021-ci ilin may ayında o, növbəti dəfə uşaqları da götürüb anasıgilə getdi. Fərqanə anasıgildə qaldığı müddət ərzində boşanmaq üçün ərizə ilə Xəzər Rayon Məhkəməsinə müraciət etdi. Lakin yenə də bütün gücümlə Fərqanə ilə barışmaq və birlikdə mehriban yaşamaq üçün çalışırdım. Bu səbəbdən də onun anasıgilə gedərək arvadımla danışdım və evimizə qayıtmasını xahiş etdim. Lakin həmin gün Fərqanə evə qayıtmadı. Bundan sonra 3-4 dəfə həyat yoldaşımla danışdım və sonda Fərqanə evə qayıtmağa razı oldu. Mən də Fərqanəni uşaqlarla birlikdə götürüb evimizə qayıtdım. Onlar evdə təxminən 4 gün qaldılar. Bu müddət ərzində dəfələrlə Fərqanədən gedib məhkəmədən ərizəsini geri götürməsini xahiş etdim. Lakin Fərqanə boşanmağa israrlı olduğundan ərizəni geri götürməyəcəyini bildirdi. Arvadımın boşanmaq istəməsi məni pis vəziyyətə saldı. Çünki ailəmə bağlı adamam. Balalarımı və arvadımı çox sevirəm. Boşanmağımız bizim uşaqların da gələcəyinə pis təsir edəcəyindən dəfələrlə Fərqanədən gedib ərizəsini geri götürməsini xahiş edirdim. Lakin o, ərizəni geri götürmək istəmədi”.
