İşini itirən vətəndaşların kredit borclarının sığorta hesabına tam və ya qismən ödənilməsi nəzərdə tutulur. Çünki işsizlikdən sığorta ilə bağlı yeni qaydalar hazırlanır.
Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov “Xəzər Xəbər”ə müsahibəsində bildirib ki, kredit risklərinin sığortalanması təsdiq olunacaq qaydalarda nəzərdə tutulan hallar baş verən zaman ödənilə bilməyən borcun üçüncü tərəfin vəsaiti hesabına bağlanması nəzərdə tutulacaq.
V.Bayramov deyib ki, Mərkəzi Bank artıq qaydaları hazırlayıb və qısa müddətdə tətbiqi gözlənilir. Yeni qaydalar birbaşa kredit götürən şəxslərin işsiz qalma riskindən sığortalanmasını nəzərdə tutur.
V.Bayramov onu da bildirib ki, sığorta ödənişlərindən sui-istifadənin qarşısını almaq üçün yalnız qanunda nəzərdə tutulan hallarda, məsələn, ixtisar və ya işəgötürənin fəaliyyətinin dayandırılması zamanı sığorta ödənişi ediləcək. İşçinin öz ərizəsi ilə işdən çıxması isə sığorta hadisəsi sayılmayacaq.