Xarici idmançıların milliləşdirilərək Azərbaycan yığmalarına cəlb olunması milli komandaların formalaşdırılmasında diqqət çəkən məsələlərdəndir. Legionerlərin təcrübəsindən yararlanmaq və beynəlxalq yarışlarda uğur qazanmaq məqsədi ilə yanaşı, bu yanaşmanın yerli idmançıların inkişafına və milliyə düşmək imkanlarına təsiri də suallar doğurur.
Bəs bu il müxtəlif idman növləri üzrə neçə əcnəbi idmançı milliləşdirilib və milli komandaların heyətinə cəlb olunub?
Trend məsələ ilə bağlı idman federasiyalarına sorğu ünvanlayıb.
Azərbaycan Cüdo Federasiyasından sorğuya cavab olaraq bildirilib ki, bu il cüdo üzrə bir əcnəbi idmançı milliləşdirilib. Bu, qadınlar arasında 63 kiloqram çəki dərəcəsində mübarizə aparan Hanna Zaytsevadır.
Əslən ukraynalı olan cüdoçu karyerasına Ukrayna yığmasında başlayıb. O, Azərbaycanı təmsil etməzdən əvvəl Polşa millisində çıxış edib.