Məzmuna keç
Azərbaycan bayrağı Pravda.az — xəbər portalı
Özəl

Evdar analar bu sözləri eşitmək istəmir

Paylaş:
Evdar analar bu sözləri eşitmək istəmir
Bizi Google News-da izləyin

Analıq həssas mövzudur. Bu barədə fikir bildirməzdən əvvəl bir anlıq dayanıb düşünmək lazımdır. Çünki işləməyən, vaxtını evdə uşaqlarına və ailəsinə həsr edən analar da bəzən ətrafdakı insanların yersiz və düşünülməmiş fikirləri ilə qarşılaşırlar.

Pravda.az bildirir ki, qadınların əmək bazarında iştirakı getdikcə artır və işləyən anaların sayı da çoxalır. Bununla belə, bəzi qadınlar karyera qurmaq əvəzinə evdə qalaraq uşaqlarına baxmağı seçirlər. Bu seçim isə heç də onların asan və qayğısız həyat sürdüyü anlamına gəlmir.

Evdar analarla söhbət edərkən onların həyat tərzini kiçiltmək və ya seçimlərini sorğulamaq əvəzinə, diqqətli olmaq vacibdir. Bəs onlara hansı ifadələri deməkdən çəkinmək lazımdır?

“Yəqin, boş vaxtın çox olur!”
Ananın işləməməsi bütün vaxtının özünə qaldığı demək deyil. Günün 24 saatı diqqət və qayğıya ehtiyacı olan bir və ya bir neçə uşaqla məşğul olmaq bəzən iş həyatındakı gündəlik planlamadan daha çətin ola bilər.

Uşaqlar yatanda və ya ataları ilə harasa gedəndə ananın özünə vaxt ayırmaq imkanı yaranır. Amma bu zaman da yorğun ana nə edəcəyini seçməkdə çətinlik çəkir: ev işlərini tamamlasın, aylardır təxirə saldığı şəxsi baxımına vaxt ayırsın, yoxsa rəfiqəsi ilə görüşüb bir az söhbət etsin?

Həftənin hər günü işə getməmək evdar ananın bol-bol boş vaxtının olması demək deyil.

“Sənin həyatın daha sakit keçir!”
Bəli, işə tələsmək, iş görüşlərinə çatmaq kimi qayğılarım olmaya bilər. Amma uşaqların problemləri də heç vaxt bitmir!

Hər gün yeni hadisələrlə qarşılaşan və uşaqların qayğısını çəkən ana üçün sakitlik bəzən hamı yatdıqdan sonra ayaqlarını uzadıb bir az dincəlməkdən ibarətdir.

“Əslində, uşaqlar üçün belə daha yaxşıdır...”
Əlbəttə, uşaqların anaları ilə vaxt keçirməsi onlar üçün faydalıdır. Amma işləyən anaların da uşaqlarına zərər verdiyini söyləmək doğru deyil.

Uşaqlarla keyfiyyətli vaxt keçirmək vacibdir. Lakin daim uşaqları ilə məşğul olan, özünə vaxt ayıra bilməyən və şəxsi ehtiyaclarını arxa plana keçirən ana bir müddət sonra özü də tükənə bilər.

Hər ana övladı üçün ən yaxşısını istəyir. Ancaq işləmədiyi üçün uşağına daha yaxşı ana olduğunu söyləmək heç kimin işi deyil.

“Onsuz da işləmək çox pis şeydir!”
Bəli, işləyən hər kəs işindən məmnun olmaya bilər. Ancaq gündəlik ev işlərinin və uşaq qayğısının içində itib-batan bir ananın da işləmək həyatına həsrətlə baxa biləcəyini unutmaq olmaz.

İş həyatını pisləmək evdə qalmağı seçən ananın həyatını daha yaxşı etmir. Hər kəsin öz seçimi və öz arzuları var.

“Yenidən nə vaxt işə qayıdacaqsan?”
Bəzi analar evdə qalmağı müvəqqəti seçim deyil, şüurlu qərar kimi qəbul edirlər. Onlar bu rolu həyatlarının vacib bir hissəsi hesab edir və ailələrinə verdikləri töhfədən məmnunluq duyurlar.

Bu seçim də hörmət və dəstəyə layiqdir. Belə suallar isə sanki maaşlı işin daha dəyərli və üstün seçim olduğu təəssüratını yaradır.

Unutmayaq ki, evdə qalmaq qadının həyatında sadəcə “əsl işinə” qayıdana qədər davam edən fasilə deyil. Evdə də ciddi əmək sərf olunur.

“Mən əsla bacarmazdım, çox darıxdırıcı olardı!”
Bu ifadə evdə qalmağın heç bir çətinlik, zehni məşğuliyyət və ya həyəcan gətirmədiyi fikrini yaradır. Sanki insanın həyatı yalnız maaşlı işdə çalışdığı zaman mənalı ola bilər.

Halbuki evdar olmaq böhranları idarə etmək, planlaşdırma aparmaq və daim problemlərə həll tapmaq kimi ciddi bacarıqlar tələb edir.

Əminə Bayramova

Paylaş:

Ən son xəbərlər