Ermənistan baş nazirinin aparat rəhbəri Lilit Makunts deyib ki, Ermənistan Azərbaycanla sülh müqaviləsini yekun olaraq imzaladıqdan sonra beynəlxalq instansiyalarda Azərbaycana qarşı qaldırdığı iddiaları geri götürə bilər. Bu isə Ermənistan tərəfinin ərazi iddialarını dəyişdirmədiyi təqdirdə sülh müqaviləsinin imzalanıb imzalanmayacağı ilə bağlı müzakirələr yaradıb.
Mövzu ilə bağlı Pravda.az-a açıqlama verən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Samir Vəliyev bildirib ki, hazırda Cənubi Qafqaz regionunda sabitlik hökm sürür.
Deputat qeyd edib ki, bu sabitliyin dayanıqlı sülhə çevrilməsi bölgə xalqlarının maraqlarına uyğundur: “Azərbaycan daim bu istiqamətdə təşəbbüslər göstərib və göstərməkdədir. Azərbaycanın ərazi bütövlüyünün və suverenliyinin tam bərpa olunmasından sonra regionun əməkdaşlıq məkanına çevrilməsi üçün real zəmin yaranıb. Ötən ilin avqustunda Vaşinqtonda əldə olunan razılaşmalar bölgədə sülhün təmin olunması üçün ciddi əsaslar verir. Vaşinqton Sülh Sammitində ABŞ Prezidenti Donald Trampın şahidliyi ilə imzalanmış Birgə Bəyannamə, həmçinin “Azərbaycan Respublikası ilə Ermənistan Respublikası arasında sülhün və dövlətlərarası münasibətlərin təsis olunması haqqında Saziş”in razılaşdırılmış mətninin paraflanması tarixi hadisədir. Bu görüşdən sonra 30 il ərzində davam edən münaqişə tamamilə bitib, xalqlarımız üçün sülhün, qarşılıqlı etimad dövrünün əsası qoyulub. Həmin görüşdən sonra ümumi müsbət atmosfer, sabitliyə və təhlükəsizliyə daha çox inam bizi irəliləməyə və inkişaf gündəliyimizə daha çox vaxt və resurs ayırmağa imkan verir. Artıq hər iki cəmiyyət sülhün iqtisadi, ticari və digər sahələrdə real faydalarının şahidi olur. Belə ki, artıq Azərbaycanın neft məhsulları, üçüncü ölkələrdən taxıl və digər məhsullar ölkəmizin ərazisindən keçməklə Ermənistana ixrac edilir”.