Məzmuna keç
Azərbaycan bayrağı Pravda.az — xəbər portalı
Özəl

Lerikdə məktəbdə iş saatına görə yeznəsinə xəsarət yetirən şəxs azadlığa buraxıldı 

Paylaş:
Lerikdə məktəbdə iş saatına görə yeznəsinə xəsarət yetirən şəxs azadlığa buraxıldı
Bizi Google News-da izləyin

Şirvan Apellyasiya Məhkəməsində qəsdən sağlamlığa zərər vurmada təqsirləndirilən Yusif Dövlətovun barəsindəki hökmdən verilən apellyasiya şikayəti üzrə məhkəmə iclası başa çatıb. 

Pravda.az-ın əldə etdiyi məlumata görə, sonuncu keçirilən prosesdə qərar elan olunub. 

Qərara əsasən, apellyasiya şikayəti təmin edilib, təmin edilsin. Lənkəran Ağır Cinayətlər Məhkəməsinin hökmü dəyişdirilib, ona şərti cəza verilib. Təqsirləndirilən şəxs barəsində seçilmiş həbs qətimkan tədbiri ləğv olunub və Yusif Dövlətov saxlanıldığı Ədliyyə Nazirliyinin Penitensiar xidmətinin Umbakı penitensiar kompleksində dərhal həbsdən azad edilib. 

İttihama görə, hadisə 2025-ci il oktyabrın 28-də gecə saatlarında Lerik rayonunun Vılık kəndində baş verib.

Belə ki, Yusif Dövlətov Astara şəhərində keçirilən toy mərasimindən yüngül sərxoş vəziyyətdə Vılık kəndində yerləşən evinə qayıdıb. O, həyətə daxil olaraq bir qədər irəlilədikdən sonra kənd ərazisində yerləşən B.Dövlətov adına orta məktəbin həyətində həmkəndlisi və yeznəsi, zərərçəkmiş Bəşir İbadovla qarşılaşıb.

Tərəflər salamlaşdıqdan sonra Bəşir İbadov Yusif Dövlətovdan onun barəsində Lerik Rayon Təhsil Sektoruna şikayət edib-etmədiyini soruşub. Yusif Dövlətov belə bir şikayət etmədiyini bildirsə də, Bəşir İbadov buna inanmayıb, onun atasının və bacısının ünvanına nalayiq ifadələr işlədərək təhqirlər edib.

Bu səbəbdən aralarında mübahisə yaranıb. Münaqişə zamanı əsəbiləşən Yusif Dövlətov əvvəlcə Bəşir İbadovun baş və bədəninin müxtəlif nahiyələrinə yumruqla zərbələr endirib.

Bununla kifayətlənməyən təqsirləndirilən şəxs məktəbin həyətində yanğınsöndürmə məqsədilə nəzərdə tutulmuş beli götürərək zərərçəkmiş şəxsin bədəninin müxtəlif nahiyələrinə bir neçə dəfə zərbə vurub.

Nəticədə Bəşir İbadovun sağ gicgah sümüyündən xəlbir sümüyünə qədər uzanan xətti sınığı, baş beynin ağır dərəcəli əzilməsi, sağ gicgah payında hemorragik əzilmə, sağ qulaqarxası-ənsə nahiyəsində əzilmiş yara ilə müşayiət olunan xəsarətlər yaranıb.

Məhkəmə-tibbi ekspertizasının rəyinə əsasən, həmin xəsarətlər dərəcəsinə görə zərərçəkmiş şəxsin həyatı üçün təhlükəli olmaqla, sağlamlığa ağır zərər vurma kimi qiymətləndirilib.

Lənkəran Ağır Cinayətlər Məhkəməsinin hökmü ilə Yusif Dövlətov 3 il müddətinə azadlıqdan məhrumetmə cəzasına məhkum edilmişdi. Hökmdən narazı qalan məhkum apellyasiya şikayəti verib. O, şikayətini zərərçəkmiş şəxslə barışıq əldə etməsi, himayəsində azyaşlı uşağının olması və zərərçəkmiş şəxsin ondan şikayətinin qalmaması ilə əsaslandırıb.

Qeyd: Məlumata görə, hər iki şəxs məktəbdə çalışıb. Yeznə-qayın arasında mübahisənin iş saatı üstündə yarandığı bildirilir. 

Kamal Məmmədov

Paylaş:

Ən son xəbərlər