Məzmuna keç
Azərbaycan bayrağı Pravda.az — xəbər portalı
Özəl

Oğlu tərəfindən bıçaqlanan ana onu bağışladı: “Şikayətçi deyiləm”

Paylaş:
Oğlu tərəfindən bıçaqlanan ana onu bağışladı: “Şikayətçi deyiləm”
Bizi Google News-da izləyin

Lənkəran Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Asəf Məlikovun (adı, soyadı şərtidir) cinayət işinin bəzi detalları məlum olub.

Pravda.az-ın əldə etdiyi məlumata görə, məhkəmə istintaqı zamanı o, ittiham üzrə özünü təqsirli bildiyini deyib. 

O qeyd edib ki, zərərçəkmiş Nahidə Məlikova (adı, soyadı şərtidir) onun anasıdır və onunla birlikdə Masallı rayonu ərazisində yaşayır. 

Təqsirləndirilən şəxsin sözlərinə görə, uşaqlıqdan psixi xəstəlikdən əziyyət çəkib və bununla əlaqədar müxtəlif vaxtlarda müalicə alıb.

Asəf Məlikov hadisənin baş verdiyi gün anası ilə birlikdə evdə olduğunu, səhhəti ilə əlaqədar əsəbiləşdiyini və mətbəxdə olan bıçağı götürərək anasına xəsarətlər yetirdiyini bildirib.

Təqsirləndirilən şəxs ifadəsində söyləyib ki, Nahidə Məlikovaya xəsarət yetirdikdən sonra bıçağı yerə atıb. Daha sonra evdən çıxaraq qonşusunu çağırıb və anasını evdə bıçaqla vurduğunu deyib.

Məhkəmədə verilən sualları cavablandıran Asəf Məlikov bıçağı evdən götürdüyünü, xəstəliyi səbəbindən hadisənin necə baş verdiyini və nə üçün belə hərəkət etdiyini tam anlamadığını söyləyib.

O bildirib ki, hadisə səhər saatlarında baş verib və anasına xəsarət yetirdiyinə görə peşmandır. Asəf Məlikovun sözlərinə görə, Nahidə Məlikovanı bıçaqladıqdan sonra evdən getməyib və hadisə yerinə gələn qonşu qadına kömək edib.

Məhkəmə iclasında zərərçəkmiş Nahidə Məlikova da təqsirləndirilən şəxslə barışdığını bildirib. O, oğluna qarşı şikayət və tələbinin olmadığını, onun azadlıqdan məhrumetmə ilə bağlı olmayan cəza almasını istədiyini deyib.

Təqsirləndirilən şəxs də məhkəmədən ona həbsdən kənar cəza verilməsini xahiş edib.

Lənkəran Ağır Cinayətlər Məhkəməsinin hökmü ilə Asəf Məlikova şərti cəza verilib və o, dərhal məhkəmə iclas zalında həbsdən azad edilib.


Kamal Məmmədov

Paylaş:

Ən son xəbərlər