Məzmuna keç
Azərbaycan bayrağı Pravda.az — xəbər portalı
Özəl

Qəssaba dəmir boru ilə xəsarət yetirən şəxs məhkəmə zalından həbs edildi 

Paylaş:
Qəssaba dəmir boru ilə xəsarət yetirən şəxs məhkəmə zalından həbs edildi
Bizi Google News-da izləyin

Gəncə Apellyasiya Məhkəməsində qəsdən sağlamlığa ağır zərər vurmada və xuliqanlıqda təqsirləndirilən İqbal İmanovun barəsindəki hökmdən verilən apellyasiya şikayəti üzrə məhkəmə prosesi başa çatıb.

Pravda.az-ın əldə etdiyi məlumata görə, sonuncu keçirilən prosesdə qərar elan edilib.

Qərara əsasən, apellyasiya şikayəti təmin edilməyib. 

İttiham aktına görə, hadisə 2025-ci ildə Tərtər rayonu Sarıcalı kəndində qeydə alınıb.

Belə ki, İqbal İmanov qəssablıq fəaliyyəti ilə məşğul olan tanışı zərərçəkmiş Cavid Fərəcovun (adı, soyadı şərtidir) yanına ət satışı ilə bağlı sövdələşmək məqsədilə gedib. Lakin tərəflər ətin qiyməti və satış şərtləri barədə razılığa gələ bilməyiblər. Bundan sonra İqbal İmanov ətini götürərək oradan ayrılıb.

Bu hadisədən sonra yaranmış narazılığa baxmayaraq, təqsirləndirilən şəxs əvvəlcə oradan ayrılaraq toya gedib. O, toy mərasimində spirtli içki qəbul etdikdən sonra yaşadığı evə qayıdıb.

Ardınca İqbal İmanov mobil telefon vasitəsilə zərərçəkmiş şəxsə zəng edərək ətin qiymətinin aşağı salınması və ətin geri qaytarılması ilə bağlı iradlarını bildirib. Telefon danışığı zamanı tərəflər arasında mübahisə yaranıb və onlar bir-birlərini qarşılıqlı şəkildə nalayiq ifadələrlə təhqir ediblər.

İttihamda qeyd olunub ki, Cavid tərəflər arasındakı mübahisənin nalayiq ifadələr səbəbindən kəskinləşdiyini, həmçinin İqbalın spirtli içkinin təsiri altında olduğunu bildiyi halda mübahisəni davam etdirmək məqsədilə sonuncunun yaşadığı ünvana gəlib. 

Evin qarşısında tərəflər arasında şəxsi münasibətlər zəminində yenidən münaqişə yaranıb. Bu zaman İqbal aralarında olan şəxsi mübahisəni ictimai qaydanı kobud surətdə pozan, cəmiyyətə açıq-aşkar hörmətsizlik ifadə edən hərəkətlərə çevirib. O, əlində olan dəmir boru ilə zərərçəkmiş şəxsin etibarnamə əsasında idarə etdiyi, sonuncunun atasına məxsus “Hyundai Sonata” markalı avtomobilin sol qapı və dam hissələrinə bir dəfə zərbə endirib.

Nəticədə avtomobilin qeyd olunan hissələri əzilib və nəqliyyat vasitəsinə 370 manat məbləğində maddi ziyan dəyib.

Bundan sonra İqbal həmin dəmir boru ilə Cavidin baş nahiyəsinə bir dəfə zərbə vurub. Zərbə nəticəsində zərərçəkmiş şəxs yerə yıxılaraq ağır xəsarətlər alıb.

Hadisədən sonra İqbal İmanov saxlanılaraq cinayət məsuliyyətinə cəlb edilib. 

Gəncə Ağır Cinayətlər Məhkəməsinin hökmü ilə o, 3 il 5 ay 26 gün müddətinə azadlıqdan məhrum edilib və dərhal məhkəmə iclas zalında həbs olunub.

Kamal Məmmədov

Paylaş:

Ən son xəbərlər