Məzmuna keç
Azərbaycan bayrağı Pravda.az — xəbər portalı
Özəl

Deputat: “Ağdamın gələcək uğurlarının əsas göstəricisi insanların rifahı, gələcək nəsillər üçün yaradılan imkanlar olacaq”

Paylaş:
Deputat: “Ağdamın gələcək uğurlarının əsas göstəricisi insanların rifahı, gələcək nəsillər üçün yaradılan imkanlar olacaq”
Bizi Google News-da izləyin

“Ağdamın azad olunması Azərbaycanın ərazi bütövlüyünün bərpası tarixində hərbi qələbənin siyasi nəticəyə, siyasi nəticənin isə uzunmüddətli dövlət quruculuğuna çevrilməsinin mühüm nümunəsidir. 20 noyabr – Ağdam şəhəri günü tarixi ədalətin təntənəsi olmaqla yanaşı, dövlətimizin milli irsin qorunmasına, doğma yurda qayıdışa və müasir şəhərsalma siyasətinə münasibətini ifadə edir. Ağdamın keçdiyi tarixi yol göstərir ki, ərazi bütövlüyünün bərpası ilə əldə edilən imkanların davamlı iqtisadi inkişaf və yüksək həyat keyfiyyətinə çevrilməsi dövlət siyasətinin strateji əhəmiyyətli istiqamətidir”.

Bu sözləri Pravda.az-a açıqlamasında Milli Məclisin deputatı Rövşən Muradov deyib.

R.Muradov xatırladıb ki, “Ağdam” toponiminin izahında qədim türk dilindəki “kiçik qala” anlayışı və Pənahəli xanın ağ daşdan tikdirdiyi imarətlə bağlı tarixi məlumatlar xüsusi yer tutur: “1930-cu ildə inzibati rayon kimi yaradılan Ağdam Qarabağın qədim yaşayış və təsərrüfat mədəniyyətini öyrənmək baxımından mühüm elmi əhəmiyyət daşıyır. Xüsusilə Orta Tunc dövrünə aid Üzərliktəpə abidəsində aşkar edilmiş maddi-mədəniyyət nümunələri bölgədə əkinçilik, maldarlıq və sənətkarlığın inkişafını təsdiqləyir. Bu zəngin irs Ağdamın tarixi kimliyinin və mədəni mövqeyinin əsasını təşkil edir. 1993-cü il iyulun 23-də Ağdamın işğalı minlərlə insanın doğma yurdundan didərgin düşməsi, yaşayış məntəqələrinin, mədəni və dini abidələrin dağıdılması ilə müşayiət olundu. BMT Təhlükəsizlik Şurasının 29 iyul 1993-cü il tarixli 853 saylı qətnaməsi Ağdamın işğalını pisləyərək işğalçı qüvvələrin dərhal, tam və qeyd-şərtsiz çıxarılmasını tələb etdi. Ermənistanın işğal siyasəti dövründə mülki əmlakın talan edilməsi, tarixi irsin məhv olunması və əhalinin məcburi köçkün vəziyyətinə salınması beynəlxalq humanitar hüququn ciddi pozuntuları və müharibə cinayətləri ilə bağlı məsuliyyət məsələsini gündəmə gətirdi. Prezident İlham Əliyevin rəhbərliyi ilə qazanılmış tarixi Zəfər nəticəsində imzalanan 10 noyabr 2020-ci il üçtərəfli Bəyanatının ikinci bəndinə əsasən, Ağdam noyabrın 20-də hərbi itki verilmədən Azərbaycana qaytarıldı”.

Deputat vurğulayıb ki, Müzəffər Ali Baş Komandan İlham Əliyevin 2020-ci il noyabrın 23-də Ağdamda Dövlət Bayrağımızı ucaltması azadlığın rəmzi olmaqla yanaşı, gələcək quruculuğun başlanğıcı idi: “Dövlət başçısının “Biz Ağdam şəhərini bərpa edəcəyik, bütün kəndləri bərpa edəcəyik” sözləri bu gün reallaşan genişmiqyaslı proqramın siyasi və mənəvi məzmununu ifadə edir. Dağıntıların miqyasına görə “Qafqazın Xirosiması” adlandırılan Ağdamın yenidən qurulması dövlətimizin iradəsini və iqtisadi imkanlarını nümayiş etdirir. 2020-ci ildə “Ağdamın azad olunmasına görə” medalının, 2023-cü ildə isə Prezidentin Sərəncamı ilə Ağdam şəhəri gününün təsis edilməsi tarixi Zəfərimizin əbədiləşdirilməsinə xidmət edir. Nazirlər Kabinetinin 2022-ci ildə təsdiqlədiyi Ağdam şəhərinin 2040-cı ilədək inkişafına dair Baş plan yaşayış, məşğulluq, nəqliyyat, ekoloji tarazlıq və ictimai xidmətlərin əlaqəli inkişafını nəzərdə tutur. Perspektivdə 100 min nəfərlik şəhər mühitinin formalaşdırılması planlaşdırılır. Böyük Qayıdış üzrə 2026-cı ilin birinci yarısının monitorinq məlumatlarında Ağdam şəhərində 814 ailənin məskunlaşdığı qeyd olunur. Noyabr ayına aid məlumatlarda isə şəhər, Xıdırlı, Kəngərli və Sarıcalı kəndləri üzrə ümumilikdə 8300 nəfərin məskunlaşdığı göstərilir. Bu prosesin davamlılığı yaşayış infrastrukturu ilə yanaşı, təhsil, səhiyyə və məşğulluq imkanlarının paralel genişləndirilməsindən asılıdır. Ağdamın iqtisadi dirçəlişində 190 hektarlıq Sənaye Parkı mühüm istehsal və investisiya mərkəzinə çevrilir. Prezident İlham Əliyevin 2026-cı il noyabrın 7-də yeni müəssisələrin açılışında iştirakı sahibkarlığın inkişafına göstərilən ardıcıl diqqətin göstəricisidir. Bərdə–Ağdam dəmir yolu, Dəmir Yolu və Avtovağzal Kompleksi, avtomobil yolları və enerji infrastrukturu şəhərin istehsal, logistika və xidmət potensialını artırır. Burada başlıca iqtisadi vəzifə dövlət investisiyalarının yerli əlavə dəyərə, rəqabətqabiliyyətli müəssisələrə və daimi iş yerlərinə çevrilməsidir. Ağdamın əvvəlki şöhrətinin bərpası onun mədəni həyatının dirçəldilməsini də əhatə edir. Bərpa edilmiş Cümə məscidi və İmarət Kompleksi, Ağdam Muğam Mərkəzi, yeni məktəblər, “Aghdam City Hotel” və “Hilton Garden Inn Agdam” hotelləri şəhərin mədəni, sosial və turizm imkanlarını genişləndirir. Prezident İlham Əliyevin Ağdama ardıcıl səfərləri ilə müşayiət olunan bu inkişaf prosesi tarixi yaddaşın qorunması ilə müasir iqtisadi tələblərin uzlaşdırılmasına əsaslanır. Ağdamın gələcək uğurlarının əsas göstəricisi isə tikilən obyektlərin miqyası ilə yanaşı, doğma yurduna qayıdan insanların rifahı, iqtisadi fəallığı və gələcək nəsillər üçün yaradılan imkanlar olacaq”.

Şəhanə Qədirli

Paylaş:

Ən son xəbərlər