Şirvan Apellyasiya Məhkəməsində xuliqanlıqda və soyğunçuluqda təqsirləndirilən Davud Nəbiyev və Maqsud Əsədovun (hər ikisinin adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, sonuncu keçirilən prosesdə elan olunub ki, təqsirləndirilən şəxslər məhkəməyə ərizə göndərərək apellyasiya şikayətindən imtina etdiyini bildiriblər.
Qərara əsasən, apellyasiya şikayətindən imtina qəbul olunub və apellyasiya şikayətinə baxılmasına xitam verilib.
İttiham aktına görə, hadisə 2025-ci ildə saat 23 radələrində Şirvan şəhərinin Şirin Şükürov küçəsində baş verib. Davud Nəbiyev tanışı Maqsud Əsədovla birlikdə zərərçəkmiş Fərəc Vəliyevlə (adı, soyadı şərtidir) mübahisə edib. Mübahisəyə səbəb kimi zərərçəkmiş şəxsin digər Davudla kobud danışması göstərilib.
Davud heç bir əsaslı səbəb olmadan yaranmış mübahisəni davam etdirib, ətrafda başqa şəxslərin olmasına əhəmiyyət vermədən Fərəcin ünvanına ucadan nalayiq ifadələr işlədib. Sonra hər iki şəxs zərərçəkmişi yumruq və təpiklə bədəninin müxtəlif nahiyələrindən vurub.
Hadisə nəticəsində zərərçəkmiş şəxsin üst çənəsində soldan üçüncü dişi sınıb, dördüncü dişi isə laxlayıb.
