Bu gün dünya təhsili rəqəmsal transformasiya mərhələsini yaşayır. Süni intellekt texnologiyalarının təhsil sistemində tətbiqinin genişlənməsi bu sahədə yeni imkanlar yaratmaqla yanaşı, çoxsaylı elmi-texnoloji layihələrin həyata keçirilməsini də zəruri edir. Bu prosesdə dövlət qurumları və universitetlərlə yanaşı, vətəndaş cəmiyyəti institutlarının, xüsusilə qeyri-hökumət təşkilatlarının da fəal iştirakı mühüm əhəmiyyət daşıyır.
“Peşəyönümlü təhsilin inkişafına yardım” İctimai Birliyi (PTİYİB) də bu istiqamətdə ictimai əsaslarla “Müasir Təlim Texnologiyaları” adlı layihə həyata keçirir. İnnovativ təhsil layihəsinin ideya müəllifi və rəhbəri PTİYİB-in sədri, dosent İlham Əhmədovdur.
Layihəyə bakalavr pilləsində təhsil alan 20 tələbə cəlb olunub. Dörd onlayn təlimdən ibarət layihənin ilkin mərhələsində iştirakçılar üçün süni intellektin əsaslarına dair iki onlayn təlim keçirilib. Təlimlər zamanı tələbələrə süni intellekt alətlərinin köməyi ilə “Müasir Təlim Texnologiyaları” kursu üzrə öyrədici elektron resursların hazırlanması yolları izah edilib. Layihənin növbəti mərhələsində tələbələrin hazırladıqları rəqəmsal resursların sosial şəbəkələrdə paylaşılması nəzərdə tutulur. Bu məqsədlə eyniadlı YouTube kanalı yaradılıb. Kanalda ümumilikdə 25 öyrədici videoresurs və podkastın yerləşdirilməsi planlaşdırılır. Artıq 10 video kanalın izləyicilərinin istifadəsinə verilib.